தக்காளி தொக்கு!!!

 முன்பெல்லாம் புதுமையான குறிப்புகள் பார்த்துப் பார்த்து செய்து உடனேயே என் சமையல் தளத்திலேயோ அல்லது இங்கேயோ பதிவும் போடுவேன். கொரோனா காலம் வந்த பின் நிறைய ஆர்வங்கள் எங்கே போயிற்று என்றே தெரியவில்லை. சமீபத்தில் நான் வழக்கம்போல் செய்த‌ தக்காளித்தொக்கு என்னை பதிவேற்றத்தூண்டியது.

எத்தனையோ வருடங்களாக நான் அடிக்கடி செய்யும் தக்காளி தொக்கு இது. தோசைக்கு மிகவும் பொருத்தமானது என்பதால் செய்த உடனேயே எப்போதும் பாதி தீர்ந்து விடும். தக்காளி மட்டும் சதைப்பற்று உள்ளதாக, சிவந்த‌ நிறத்தில் இருக்க வேண்டும். இப்போதெல்லாம் இப்படிப்பட்ட தக்காளி கிடைப்பது மிகவும் அரிதாக இருக்கிறது. தயிர் சாதம், பொங்கல் எல்லாவற்றிற்கும் மிகவும் பொருத்தமான பக்கத்துணை. இப்போது செய்முறைக்குப்போகலாம்!

தேவையான பொருள்கள்:

தக்காளி பெரியதாக -4

பூண்டு [சிறியது]‍- 10 இத்ழ்கள்

புளி- நெல்லிக்காய் அளவு

வற்றல் மிளகாய்- 6

தேவையான உப்பு, நல்லெண்ணெய்‍

வெந்தயம்- 1 ஸ்பூன்

காயம் -ஒரு சிறு துன்டு

மஞ்சள் தூள் -அரை ஸ்பூன்

கடுகு -1 ஸ்பூன்

கறிவேப்பிலை -1 ஆர்க்

செய்முறை:

பெருங்காயத்தை சிறிது எண்ணெயில் பொரித்துக்கொள்ளவும்.

வெந்தயத்தை வெறும் வாணலியில் பொன்னிறமாக வறுத்துக்கொள்ளவும்.

இவை ஆறியதும் பொடித்துக்கொள்ளவும்.

புளியை சிறிது வெந்நீரில் ஊற வைக்கவும்.

பின் ஊறிய புளியுடன் மிளகாய், தக்காளி சேர்த்து விழுதாக அரைத்துக்கொள்ளவும்.

வாணலியை அடுப்பில் வைத்து சூடாக்கவும்.

அதில் அரைத்த விழுதைக்கொட்டி வேக வைக்கவும்.

மஞ்சள் தூள் சேர்த்து கிளறிக்கொடுக்கவும்.

தண்ணீரெல்லாம் சுண்டி கெட்டியாகும்போது தீயைக்குறைத்து உப்பு சேர்த்துக்கிளறவும்.

வேறு ஒரு சிறு வாணலியில் நல்லெண்ணெய் ஊற்றி அது சூடானதும் கடுகு, கறிவேப்பிலையை தாளிக்கவும்.

தீயை வெகுவாக குறைத்து பொடியாக நறுக்கிய பூண்டிதழ்களைப்போட்டு வதக்கவும்.

பூண்டு சிவக்காமல் வதக்கி தக்காளி தொக்கில் கொட்டி குறைந்த தீயில் சமைக்கவும்.

மேலும் நல்லெண்ணெய் அவ்வப்போது சேர்க்கவும்.

தொக்கின் நிறம் நன்கு சிவந்த கலரில் வரும்போது, மேலே எண்ணெய் மிதக்கும்போது அடுப்பிலிருந்து இறக்கவும்.

சுவையான தக்காளி தொக்கு தயார்!!