முத்துக்குவியல்-68!!!

 சாதனை முத்து

ஷ்ரேயா சித்தனாகெளடர்

2016ல் இவர் மணிப்பாலில் பொறியியல் படித்துக்கொண்டிருந்த போது எல்லா இளம் பெண்களைப்போல இவருக்கும் கனவுகளும் எதிர்பார்ப்புகளும் ஆயிரம் இருந்தன.

ஆனால் இவர் வாழ்க்கையில் நடந்தேறிய விபரீதங்கள் இவர் கனவுகளை மட்டுமல்ல, எதிர்காலத்தின் மீது அவர் கொண்டிருந்த ந‌ம்பிக்கைகளையும் புரட்டிப்போட்டு தன் காலடியில் மிதித்து நசுக்கியது.

அதே 2016ம் வருடம் பூனாவிலுள்ள தன் பெற்றோரிடம் சென்று தன் விடுமுறையை சந்தோஷமாகக் கழித்து விட்டு மணிப்பாலுக்கு ஒரு பஸ்ஸில் ஏறினார் ஷ்ரேயா.

விடியற்காலையில் ஓட்டுனருடைய தவறினால் பஸ் தலை குப்புற புரண்டு விழுந்து சற்று தூரம் இழுத்துக்கொன்டே போனதால் ஷ்ரேயாவின் இடது முன்னங்கை மோசமாக நசுங்கி நூலிழையில் தொங்கிக்கொண்டிருக்க, வயிற்றிலும் வலது முழங்காலிலும் சதை கிழிந்து தோலுரிந்து தொங்கிகொண்டிருக்க, முகமும் தலையும் கூட காயங்களால் நிரம்பியிருந்தன. மணிப்பாலில் கஸ்தூரிபாய் மருத்துவ மனையில் சேர்க்கப்பட்டு இரண்டு நாட்கள் கழித்தே தன் இரு முன்னங்கைகளும் வெட்டி எடுக்கப்பட்டதை இவரால் தெரிந்து கொள்ளவும் புரிந்து கொள்ளவும் முடிந்தது. சாப்பிட்டதை விழுங்குவதும் மூச்சு விடுவதும் நடப்பதும் தவிர கழிவறை செல்வது உள்பட மற்றெல்லா செயல்களுக்கும் அவர் அடுத்தவரை சார்ந்திருக்க வேண்டிய வாழ்க்கையை தொடங்க ஆரம்பித்தார் ஷ்ரேயா. 

' கைகள் தானே போயின, கால்கள் நன்றாக இருக்கின்றன, மன உறுதியும் இருக்கிறது ' என்று தன்னைத்தானே தேற்றிக்கொண்டு கொஞ்சம் கொஞ்சமாக தன்னிரக்கத்திலிருந்தும் தாங்க இயலாத சோகத்திலிருந்தும் வெளியே வர ஆரம்பித்தார் ஷ்ரேயா. சில நாட்களிலேயே தன் கால் விரல்களால் தொலைபேசி, டிவி ரிமோட், லாப்டாப் முதலியவற்றை இயக்க ஆரம்பித்தார். உலோகத்திலான கைகள், மரத்திலான கைகள் உபயோகித்து பார்த்தாலும் அவற்றின் கனமும் அவற்றால் ஏற்பட்ட இடர்ப்பாடுகளையும் அவரால் தாங்க முடியவில்லை. முடிவில் பெற்றோர் கொடுத்த ஊக்கத்திலும் தைரியத்திலும் கைகளுக்கான மாற்று அறுவை சிகிச்சையை மேற்கொள்ள முடிவு செய்தார். சுற்றி இருந்தவர்கள், உறவினர்கள், மருத்துவர்கள், நண்பர்கள் என்று பலரும் அவரது முடிவு தவறானது என்று உறுதியாகச் சொன்னாலும் இவர் முன் வைத்த காலை பின் வைக்கவில்லை. கைகள் மாற்று அறுவை சிகிச்சை செய்து கொண்டால் வாழ்நாள் முழுவதும் கடுமையான பக்க விளைவுகள் தரும் மருந்துகளை எடுக்க வேண்டுமென்பதும் புதிய கைகள் முழுவதுமாக இயங்க கடுமையான பயிற்சிகளை மேற்கொள்ள வேண்டும் என்பதும் இவருக்கு தெரிந்த உண்மை! ஆனாலும் அந்த கடுமையான சோதனைகளைத்தாங்க அவர் தன் மனதை தயார்ப்படுத்திக்கொண்டு, 2017ல் கொச்சியிலுள்ள அம்மா மருத்துவ மனையில் மருத்துவர். சுப்ரமணிய ஐயரிடம் தனக்கு கைகள் மாற்று அறுவை சிகிச்சைக்காக பதிவு செய்தார். 

பொதுவாக உடல் உறுப்பு தானம் செய்பவர்கள் கைகளை மட்டும் தானம் செய்வதில்லை. அந்த அளவு விழிப்புணர்வு மக்களிடம் இல்லை என்று சொல்லும் இவர் பொதுவாக நிறைய சமூகப்பிரிவுகளில் கைகளை தானமாகக் கொடுப்பது மட்டும் சரியானதில்லை என்ற நம்பிக்கை உலவுவதாக குறிப்பிடுகிறார். 

கைகளுக்காக இவர் பதிவு செய்த அன்றே,  அன்றைய தினம் இறந்து போன இளைஞர் ஒருவரின் கைகள் தானமாகக்கிடைக்கவும் 2017, ஆகஸ்ட் மாதம் 9ந்தேதி 14 மணி நேரங்கள் அறுவை சிகிச்சை நடந்து மணிக்கட்டிலிருந்து முழங்கை வரையிலான கைகள் தானம் பெற்ற‌ ஆசியாவின் முதல் பெண்ணாகவும் ஆண்களின் கைகளை தானமாகப்பெற்ற உலகின் முதல் பெண்ணாகவும் இவர் மாறினார். தனக்கு தன் மகனின் கரங்களை தானமாகக் கொடுத்த இளைஞர் சச்சினின் பெற்றோரை இவர் அடிக்கடி சந்தித்து நன்றி கூறியிருக்கிறார். 

ஆண்களின் கரங்களைப்பெற்றிருந்தாலும் சில மாதங்களுக்குப்பிறகு  கைகள் பெண்ணின் கரம் போல மாறத்தொடங்கியது. கருமையான கரங்கள் தற்போது ஷ்ரேயாவின் கைகளுக்குத்தகுந்தாற்போல சிவப்பாகவும் மாறத்தொடங்கியுள்ளன. இந்த மாறுதலுக்கான காரணங்கள் புரியாமல் மருத்துவ உலகே வியக்கிறது!!

இசை முத்து:

ராகங்களில் ' மோகனம்' மனதை மயக்கும் ராகம் எனச்சொல்லப்படுகிறது. எல்லா ராகங்களும் எந்தெந்த வேளைகளில், நேரத்தில் பாடப்பட வேண்டும் என்ற நியதியும் உள்ளது. மோகனம் மட்டும் எந்த நேரத்திலும் பாடக்கூடிய புகழை பெற்றிருக்கிறது. அதனால் தானோ என்னவோ திருவாசகம் கூட ' மோகன ராகத்தில்' தான் பாடப்படுகிறது. இத்தகைய பெருமை பெற்ற மோகன ராகத்தை புகழ் பெற்ற வயலின் மேதை திரு. கார்த்திக் ஐயர் எப்படி ஆலாபனை செய்கிறார் என்பதை கேட்டு ரசியுங்கள்!

முத்துக்குவியல்-66!!

 உயர்ந்த முத்து:

திருமணமாகாதவர்கள், கணவரைப் பிரிந்தவர்கள், இழந்தவர்கள், விவாகரத்தானவர்கள், குடும்பத்தாரால் கைவிடப்பட்டவர்கள் என தனிமையில் தவிக்கும் பெண்களுக்கு ஆறுதலையும், வாழ்க்கையில் வெளிச்சத்தையும் காட்டுகிற ஒரு அமைப்பு ‘வழிகாட்டும் ஒளி’.

கணவனால் கைவிடப்பட்ட பெண்கள், விதவைகள், விவாகரத்தான பெண்கள், திருமணம் செய்து கொள்ளாமல் இருக்கும் பெண்கள் என தனிமையுடன் வாழ்க்கையில் போராடிக்கொண்டிருக்கும் பெண்களுக்கு வழிகாட்டும் ஒளி விளக்காக விளங்கிக்கொண்டிருக்கிறார், பிரேமா. 61 வயதாகும் இவர் வங்கி அதிகாரியாக பணிபுரிந்து ஓய்வு பெற்றவர். சென்னை கோடம்பாக்கத்தில் வசித்து வருகிறார். பிரேமாவின் வாழ்க்கை தனிமையில் துயரங்களை அனுபவிக்கும் பெண்களின் சோகங்களை சுமக்கும் போராட்ட பின்னணியை கொண்டது. அதில் இருந்து மீள்வதற்காக மேற்கொண்ட முயற்சிகள் அவரை சமூக சேவகியாக மாற்றி இருக்கிறது.

தன்னை போல் ஆதரவின்றி தனிமையில் வாழ்க்கையை நகர்த்தும் பெண்களுக்கு உதவிக்கரம் நீட்டும் விதமாக ‘நேசம்’ என்ற அமைப்பை நடத்தி வருகிறார். பொருளாதார ரீதியாக அவர் களின் வாழ்க்கை தரத்தை உயர்த்தும் நோக்கில் கைத்தொழில், வேலை வாய்ப்பு பயிற்சிகளை வழங்கி வருகிறார். கணவன், குடும்பத்தினர் ஆதரவு இன்றி நிராதரவாக நின்று குழந்தைகளை வளர்க்க கஷ்டப்பட்ட பெண்கள் இவரின் வழிகாட்டுதலால் வாழ்க்கையில் முன்னேறி இருக்கிறார்கள். தங்கள் குழந்தைகளை படிக்க வைத்து நல்ல நிலைக்கும் உயர்த்தி இருக்கிறார்கள்.

இவர் நடத்தும் ‘வழிகாட்டும் ஒளி’ என்ற சேவை மூலம் கல்வி உதவி பெற்று படித்தவர்கள் ஏராளமானோர் என்ஜினீயர்களாக, தனியார் நிறுவனங்களில் அலுவலர்களாக பணிபுரிந்து வருகிறார்கள். நிறைய பேர் படிப்பை தொடர்ந்து கொண்டிருக்கிறார்கள். படிக்கும் வயதிலேயே குடும்பத்திற்கு வருமானம் ஈட்டிக்கொடுக்கும் வகையில் ஏழை சிறுவர், சிறுமியர் களுக்கு வீட்டில் இருந்தே கைத்தொழில் செய்வதற்கும் பயிற்சி வழங்கிக்கொண்டிருக்கிறார், பிரேமா.

இளம் வயதில் பெற்றோர் எதிர்ப்பை மீறி காதல் திருமணம் செய்திருக்கிறார். அந்த வாழ்க்கையும் நிலைக்காமல் போயிருக்கிறது. அந்த துயரமும், மீண்டும் பெற்றோருடன் சேர முடியாத தவிப்பும், தனிமை வாழ்க்கையும் மனதை வேதனைக்குள்ளாக்கி இருக்கிறது..

காதல் திருமண வாழ்க்கை தந்த துயரத்தில் இருந்து மீள்வதற்குள்ளாக விபத்து ரூபத்தில் மீண்டும் வேதனை தொடர்ந்திருக்கிறது. தன் தோழியுடன் இருசக்கர வாகனத்தில் சென்றவர் விபத்தில் சிக்கி இடுப்பு எலும்பு முறிவு ஏற்பட்டு எழுந்து நடமாடமுடியாமல் அவதிப்பட்டிருக்கிறார். அதிலிருந்தும் தேறியவர் இப்போது குடல் புற்றுநோய் பாதிப்புக்கு மத்தியிலும் தொடர்ந்து சேவை மனப்பான்மையுடன் இயங்கிக்கொண்டிருக்கிறார். 

இசை முத்து:

பொதுவாய் நாதஸ்வரத்தில் மிக இனிமையான திரைப்படப் பாடல்களை அதன் இனிமையும் தரமும் கொஞ்சம் கூட குன்றாது அதே இனிமையுடன் வாசிக்க முடியும் என்ற நம்பிக்கை எனக்கு இருந்ததில்லை. என் நம்பிக்கையை உடைத்து விட்டது இந்தப்பாடல். தர்பாரி கானடா ராகத்தை அப்படியே இழைத்து இழைத்து நம்மை மெய்மறக்க வைக்கிறது இவர்களின்  நாதஸ்வர இசை! கேட்டுப்பாருங்கள்!

சாதனை முத்து:

Cerebral palsy, dyslexia and dysarthria என்ற இந்த மூன்றும் நம் உடலின் தசைகளைப் பாதிக்கும் நோய்கள். இவற்றால் பாதிக்கப்பட்டு சரியாக நடக்க முடியாத, பேச்சு வராத 21 வயது மும்பை இளைஞர் ஒருவர் கல்வியில் முன்னேறி பட்டப்படிப்பு படித்து, லக்னோ ஐ.ஐ.எம்.மில் உயர் கல்விக்கு தேர்வாகியிருக்கிறார். இவர் யாஷ் அவதேஷ்.

 எண்களை கணக்கிட வராத குறைபாடும் இவருக்கு இருந்தது. விடாமுயற்சியுடன் கற்று, CAT- 2019 தேர்வில் 92.5 சதவிகிதத்துடன் வெற்றி பெற்று ஐ.ஐ.எம்.மில் இடம் பெற்றிருக்கிறார்.

முத்துக்குவியல்-65!!

 

அசத்தும் முத்து:

திண்டுக்கல்லைச் சேர்ந்த ஒன்பதாம் வகுப்பு பள்ளி மாணவர் ஒருவர் whatsapp - ஐ விட அதிக வேகம் மற்றும் வசதிகள் கொண்ட செயலியை உருவாக்கி சாதனை படைத்துள்ளார்.

திண்டுக்கல் அருகே உள்ள தாமரைபாடி பகுதியைச் சேர்ந்தவர் மாரிமுத்து. இவரது மகன் பிரனேஷ். 9ஆம் வகுப்பு படித்து வருகிறார். கொரோனா ஊரடங்கு காரணமாக பள்ளிகள் திறக்காத நிலையில் மாணவர் பிரனேஷ் எதையாவது சாதிக்க வேண்டும் என்ற ஆவலில் கூகுளினால் நடத்தப்படும் கோடிங் ஆன்லைன் கிளாஸில் சேர்ந்து படித்து வந்துள்ளார். இதன் தொடர்ச்சியாக மாணவர் பிரனேஷ் வாட்ஸ்அப் செயலி போல "ஜெட் லைவ் சாட்" என்ற புதிய செயலியை உருவாக்கினார். இந்த செயலியை கூகுள் நிறுவனத்திற்கு ஒப்புதலுக்காக அனுப்பி வைக்கப்பட்டது. கூகுள் நிறுவனம் இந்த புதிய செயலிக்கு ஒப்புதல் அளித்து ப்ளே ஸ்டோரில் வெளியிட்டுள்ளது.

 தற்போது ப்ளே ஸ்டோரில் சென்று ஜெட் லைவ் சாட் என டைப் செய்து இந்த செயலியை பதிவிறக்கம் செய்து கொள்ளலாம். இந்தப் புதிய செயலி வாட்ஸ் அப் செயலியை விட அதிக வேகம் மற்றும் வசதிகள் கொண்டுள்ளன. பாதுகாப்பு அதிகம் ஒருவர் அனுப்பும் தகவலை நமக்கு அறிமுகமில்லாத நபர் யாரும் பார்க்க முடியாது. பதிவிறக்கமும் செய்ய இயலாத வண்ணம் பாதுகாப்பு வசதிகள் அதிகம் கொண்டுள்ளது. வாட்ஸ் அப் செயலியில் ஒரு தகவலை ஐந்து நபர்களுக்கு மட்டுமே அனுப்ப முடியும். ஆனால் இந்த புதிய செயலி மூலம் ஒரு தகவலை ஒரே நேரத்தில் பதினைந்து நபர்களுக்கு அனுப்பலாம். இது போன்ற நவீன தொழில்நுட்ப வசதிகளுடன் மாணவர் உருவாக்கியுள்ள இந்த புதிய செயலி, வாட்ஸ் ஆப்பைவிட பல்வேறு பரிணாமம் பெற்றுள்ளது. இதன் காரணமாக இந்த செயலி பொதுமக்கள் மத்தியில் அதிக வரவேற்பை பெற்றுள்ளது.

துயர முத்து:

என் மகனின் அலுவலகத்தில் மேலாளராக வேலை செய்பவர் கொரோனாவால் ஊருக்குச் சென்றவர் திரும்பி வர முடியாமல் பல மாதங்கள் தமிழ்நாட்டில்  குடும்பத்தோடு இருந்து வந்தார். அங்கும் சரி, இங்கும் சரி, கொரோனா பரவல் அதிகரித்து நிலைமை மோசமாக இருந்ததால் அவரால் இங்கு வர முடியவில்லை. சமீப காலமாக மீண்டும் விமான சேவைகள் ஆரம்பித்ததும், இங்கும் நிலைமை சற்று சீராக ஆரம்பித்ததில் அவருக்கு விரைவில் இரண்டாவது குழந்தை பிறக்க உள்ளதாயும் பிறந்ததும் கிளம்பி வருவதாகவும் என் மகனிடம் சொல்லி அனுமதி வாங்கிக்கொண்டார். சென்ற வாரம் அவருக்கு பெண் குழந்தை பிறந்தது. மகிழ வேண்டிய நேரத்தில் துன்ப இருள் மட்டுமே வீட்டில் பரவியது.

பிறந்த குழந்தைக்கு இரண்டு கண்களுக்கு பதிலாக ஒரு கண், வலது கண் மட்டுமே இருக்க, இடது கண் இருக்க வேண்டிய இடத்தில் கண் மூடியிருப்ப்து போல ஒரு கோடாக இருந்தது. அந்தக்கண்ணுக்கு சற்று தள்ளி ஒரு குட்டிக்கண் போன்ற துவாரமும் இருந்தது. புகைப்படத்தைப்பார்த்ததும் நாங்கள் அனைவரும் மிகவும் கலங்கிப்போய் விட்டோம். என்ன மாதிரியான கொடுமை இது! அந்தப் பெற்றோர் என்ன செய்வார்கள் இனி? கடைசி காலம் வரை எப்படி இந்தத்துயரத்தை சமாளிக்கப்போகிறார்கள்? . கதறி அழுபவரை என் மகனால் வார்த்தைகளால் தேற்ற முடியவில்லை. 

மூளையின் குறைவான செயல்பாடுகளால் சில குழந்தைகளுக்கு பிறவியிலேயே இப்படி ஒரு கண் விழி அல்லது இரண்டு கண்விழியுமே இல்லாமல் பிறக்க நேர்ந்து விடுகிறது என்பதும் இந்த நிலைக்கு Anophthalmia என்று பெயர் இருப்பதும் தெரிய வந்தது.

என் சகோதரி மகள் கண் அறுவை சிகிச்சை நிபுணர். அவரிடம் பேசியதில் இனி இந்தக்கண்ணிற்கு எதுவுமே செய்ய முடியாது. பார்வையற்ற நிலை தான் எப்போதும். ஆனால் வலது கண்ணின் பார்வை சரியாக இருக்கிறதா என்று தான் இனி கவனிக்க‌ வேண்டும். ஆனால் மருத்துவர்களுக்கு மூன்றாம் மாதத்தில் தான் பார்வை சரியாக உள்ளதா என்று கண்டு பிடிக்க முடியும் என்று சொன்னார். மதுரை அரவிந்த் கண் மருத்துவ மனையில் நிறைய உபகரணங்கள் இருப்பதால் அங்கு அழைத்துச் சென்று பரிசோதிப்பது நல்லது என்றும் சொன்னார். அதன் படி அங்கே பரிசோதனைகள் செய்ததில் குழந்தையின் பார்வைக்குறைபாடு உறுதியானதும் குழந்தையின் பெற்றோர் கண்ணீர் வழிய இடிந்து போய் விட்டார்கள். சில சமயங்களில் நம் கேள்விகளுக்கு பதில் கிடைப்பதேயில்லை!!

இசை முத்து:

இந்தப்பாட்டு எப்போது கேட்க நேர்ந்தாலும் மனதை பிசையும். எஸ்.பி.பியின் இனிய குரல் என்னவோ செய்யும். அந்த காட்சியமைப்பிற்கு ஏற்ற தாக்கத்தை இந்தப்பாட்டும் இவரது ஆழமான குரலும் எப்போதுமே கொடுக்கும். கேட்ட பிறகு என் கருத்து பெரும்பாலும் நிறைய பேருடைய கருத்தாகவே இருக்கும்! 

முத்துக்குவியல்-64!!

 சாதனை முத்து:

உலக நாடுகளின் நன்மைகளில் பெரும் அக்கறையுடன் செயல்படும் ஐக்கிய நாடுகள் சபைக்கு பல்வேறு கிளை அமைப்புகள் உள்ளன. அவற்றில் ஒன்று தான், சுற்றுச்சூழல் பாதுகாப்பு அமைப்பு. உலகின் நன்மைக்காகவும், சுற்றுச் சூழலை பாதுகாக்கும் வகையிலும், புதிய முயற்சிகளில் ஈடுபட்டு, ஆக்கப்பூர்வமான திட்டங்களில் வெற்றி காண்போருக்கு, இந்த அமைப்பு ஆண்டு தோறும் விருது வழங்கி கௌரவித்து வருகிறது. அந்த வகையில், இந்தியா உள்ளிட்ட பல்வேறு நாடுகளைச் சேர்ந்த, இளம் சாதனையாளர்கள், ஏழு பேர் தேர்ந்தெடுக்கப்பட்டு, 2020 ஆம் ஆண்டுக்கான, ‛உலகின் இளம் சாதனையாளர் விருது’ வழங்கி கௌரவிக்கப்பட்டுள்ளனர். 

டெல்லியில் பள்ளிப் படிப்பையும், பெங்களூரில் பொறியியல் பட்டமும் பெற்ற வித்யுத் மோகன், எரிசக்தித் துறையில் அதிக ஆர்வம் கொண்டவர். தற்போது, 29 வயதாகும் இவர், பட்டப்படிப்பு முடித்தது முதலே இத்துறை சார்ந்த நிறுவனங்களில் பணியாற்றியதோடு, அத்துறையில் பல்வேறு ஆராய்ச்சிகளையும் மேற்கொண்டுள்ளார். 

பஞ்சாப், ஹரியானா மாநிலங்களில், அறுவடைக்குப் பின், விவசாயிகள், தங்கள் நிலங்களில் இருந்து வெளியேற்றப்படும் விவசாயக் கழிவுகளை, பொது வெளியில் எரிப்பதால், தலைநகர் டெல்லி உட்பட, நாட்டின் பல முக்கிய நகரங்களில், காற்று மாசு அதிகரிக்கிறது.

இதற்கு தீர்வு காணும் வகையில், அக்கழிவுகளை பயன்படுத்தி, எரி சக்திப் பொருட்களை தயாரிக்க வித்யுத் திட்டமிட்டார். அதற்காக, தகாசார் என்ற பெயரில் நிறுவனம் ஒன்றை துவக்கினார். பின், விவசாயிகளிடமிருந்து, விவசாயக் கழிவுகளை விலை கொடுத்து வாங்கினார். வித்யுத் மோகன் கண்டுபிடித்துள்ள ஓர் இயந்திரம், நிலத்திலிருந்து கிடைக்கும் கழிவுப்பொருள்களைக் கொண்டு விவசாயிகளுக்குத் தேவையான உரத்தையும், கூடுதல் எரிசக்தி தரும் நிலக்கரி போன்ற பொருள்களையும் உருவாக்குகிறது. இவரது இந்த முயற்சியால், விவசாயக்கழிவுள் எரிக்கப்படுவதால் ஏற்படும் காற்று மாசு குறைக்கப்பட்டதோடு, இதுவரை வீணாக்கப்பட்டுக் கொண்டிருந்த கழிவுகளுக்கு, விலையும் கிடைப்பதால், விவசாயிகள் மகிழ்ச்சி அடைந்துள்ளனர். 

சுற்றுச்சூழல் மாசுபாட்டை குறைப்பதில், ஆக்கப்பூர்வமாக செயல்படும் வித்யுத் மோகனை பாராட்டி, ஐக்கிய நாடுகள் சபையின் சுற்றுச்சூழல் பாதுகாப்பு அமைப்பு, அவருக்கு, 2020ஆம் ஆண்டுக்கான, ‛உலகின் இளம் சாதனையாளர் விருது’ வழங்கியுள்ளது.

பருவ நிலை மாற்றம் தொடர்பான விஷயங்களில் ஆர்வமாகவும் ஆக்கப்பூர்வமாகவும் செயல்படும் மாணவர்களுக்கு வழங்கப்படும் முக்கிய சர்வதேச விருதான " குழந்தைகளுக்கான பருவ நிலை விருது" பெற்றிருக்கும் திருவண்ணாமலை வினிஷா சர்வதேசப்பள்ளியின் ஒன்பதாம் வகுப்பு மாணவி. இவர் சொல்கிறார்:

" ஒரு நாள் அம்மாவுடன் நடந்து போய்க்கிட்டிருந்த போது, இஸ்திரி போடும் தாத்தா இஸ்திரிப்பெட்டியில் கரியைப்போட்டு, ஊதி ஊதி புகையால் இருமி சிரமப்பட்டுக்கிட்டுருந்தார். மேலும் பயன்படுத்துற கரியை ரோட்டோரமாக கொட்டுவார். இப்படி இஸ்திரி வண்டியை பயன்படுத்துற எல்லோருமே பயன்படுத்துற கரியை ரோட்டோரமாகவோ, சாக்கடையிலோ கொட்டுறதை பார்த்திருக்கிறேன். இந்த மாதிரி எத்தனை கிலோ கரி நம் நாட்டுல எரிக்கப்படுது, அதற்கு எத்தனை மரங்கள் வெட்டப்படுது, அது ஏற்படுத்துற சுற்றுச்சூழல் தீங்கு என்று யோசிச்சேன். மின்சாரம் இல்லாமல் சூரிய ஒளியில் இயங்கும் வகையில் சோலார் இஸ்திரிப்பெட்டி வண்டியை வடிவமைக்க ஆரம்பிச்சேன். இந்த இஸ்திரிப்பெட்டி உள்ல சைக்கிள் வண்டியின் மேற்புறத்தில் சோலார் தகடுகள் பொருத்தப்பட்டிருக்கின்றன. 100 ஹெச் திறன் கொண்ட பாட்டரியை இணைச்சிருக்கிறேன். இந்த பாட்டரியை முழுமையாக சார்ஜ் செய்ய 5 மணி நேர சூரிய ஒளி தேவைப்படும். அதன் பிறகு 6 மணி நேரம் இதைத்தொடர்ச்சியாக பயன்படுத்த முடியும். "

இதற்காக, சுவீடனின் துணைப்பிரதமர் இஸபெல்லா லோவின், ஆன்லைன் விருது நிகழ்ச்சியில் இந்த விருதை வினிஷாவிற்கு வழங்கியிருக்கிறார். விருதுட்ன் பதக்கம், சான்றிதழ், 8.5 லட்சம் ரூபாய் பரிசுத்தொகை அனைத்து வழங்கப்பட்டு கெளரவிக்கப்பட்டிருக்கிறார். மத்திய அரசால் 18 வயதுக்குட்பட்டவர்களுக்கு வழங்கபப்டும் ' பால சக்தி புரஸ்கார்' விருதும் வினிஷாவிற்கு கிடைத்துள்ளது. மேலும் ' தானாக இயங்கும் ஸ்மார்ட் மின் விசிறி ' கண்டுபிடிப்பிற்காக ஒரு விருதும் கடந்த ஆண்டு டாக்டர் அப்துல் அக்லாம் இக்னைட் விருதும் பெற்றிருக்கிறார் இவர்!!

பூமி கிரகம் எதிர்கொள்ளும் மிகப்பெரிய சுற்றுச்சூழல் சவால்களுக்கு தீர்வு காணும் நோக்கில், அதற்கான சிறந்த கண்டுபிடிப்பை உருவாக்குவோருக்கு ‘எர்த்ஷாட்’ என்ற பெயரில் பரிசு வழங்கப்பட்டு வருகிறது.இங்கிலாந்து இளவரசர் வில்லியம் உருவாக்கிய இந்த பரிசு, சுற்றுச்சூழல் ஆஸ்கார் விருது என்றும் அழைக்கப்படுகிறது. இந்த விருதுக்காக தேர்ந்தெடுக்கப்படும் 5 பேருக்கு தலா 1 மில்லியன் பவுண்டு (சுமார் ரூ.10 கோடி) பரிசாக வழங்கப்படுகிறது. இந்த இறுதி போட்டி லண்டனின் அலெக்சாண்டிரா மாளிகையில் வருகிற 17-ந் தேதி நடக்கிறது. இதில் வெற்றி பெறும் படைப்பாளிகளுக்கு பரிசு வழங்கப்படுகிறது. இந்த நிகழ்ச்சியில் வினிஷா உமாசங்கர் மற்றும் வித்யுத் மோகன் இருவரும் காணொலி மூலம் பங்கேற்கின்றனர். இங்கிலாந்து இளவரசர் வில்லியமின் சுற்றுச்சூழல் ஆஸ்கார் விருதுக்கான இறுதி போட்டியில் தமிழக மாணவி வினிஷா உமா சங்கரின் சோலார் இஸ்திரி வண்டி பங்கேற்கிறது. வித்யுத் மோகனின் படைப்பும் சுற்றுச்சூழல் ஆஸ்கார் இறுதி பட்டியலில் இடம்பெற்று உள்ளது. 

உலக அளவில் இந்தியா மட்டுமின்றி தமிழகத்துக்கும் பெருமை சேர்க்கும் வகையில் சுற்றுச்சூழல் பாதுகாப்பு துறையில் உயர்ந்த கவுரவமாக கருதப்படும் இந்த விருதை வெல்வதற்காக வினிஷா மற்றும் வித்யுத் ஆகியோருக்கு நாடு முழுவதிலும் இருந்து வாழ்த்துகள் குவிந்து வருகின்றன. நாமும் வாழ்த்துவோம்!!!

ஆச்சரிய முத்து:

ஊரிலிருந்து சில மாத இதழ்கள் ஒரு நண்பர் மூலம் வந்திருந்தன. அதில் ' கோகுலம் கதிர் ' என்ற இதழில் என் ஓவியத்தைப் பார்த்தேன். 1984 என்று நினைக்கிறேன், ஆனந்த விகடன் இதழில் ஒரு சிறுகதைக்கு இந்த ஓவியத்தை வெளியிட்டிருந்தார்கள். முப்பத்தியேழு வருடங்கள் கழித்து அதை எங்கிருந்து எடுத்து பிரசுரம் செய்தார்கள் என்று தெரியவில்லை. ஆச்சரியமாக இருந்தது. இது தான் அந்த ஓவியம். 

பாதி மட்டும் எடுக்கப்பட்டு வெளியிடப்பட்டிருக்கிறது!!

முத்துக்குவியல்-63!!

 அசத்திய முத்து:

சமீபத்தில் 'சிந்துடாய் சப்கல்' என்ற பெண்மணி பற்றி படித்தபோது மனம் நெகிழ்ந்து, கனமாகியது. வாழ்க்கை முழுவதும் ஒரு பெண் பல அவலங்களையும் துன்பத்தையும் மட்டுமே சந்தித்திருந்தாலும் அவளின் கருணை அழிவதில்லை, அவள் தன்னம்பிக்கை இறப்பதில்லை. அவள் என்றுமே தன் தாய்மை உணர்வை  இழப்பதில்லை. இந்தப்பெண்மணியும் அந்த மாதிரி காருண்யம் மிக்கவளாக இருக்கிறாள். இந்தப்பெண்மணியைப்பற்றி அறிகையில் மனம் நிறைவை உணர்கிறது. அவரைப்பற்றி நீங்களும் தெரிந்து கொள்ளுங்கள். 

மகாராஷ்ட்ரா மாநிலத்தில் வர்தா மாவட்டத்தில் பிம்ப்ரி மாகே என்ற கிராமத்தில் கால்நடைகளை மேய்த்து பிழைக்கும் குடும்பம் ஒன்றில் பிறந்தவர் சிந்துடாய் சப்கல். இவர் பிறந்ததே வேண்டாத ஒன்றாய் இருந்ததால் இவர் குடும்பத்தாரால் 'சிந்தி' என்றழைக்கப்பட்டார். மராத்தியில் 'சிந்தி' என்றால் கிழிந்த துணி என்று அர்த்தமாம்! எப்படிப்பட்ட கொடுமை இது! நான்காம் வகுப்பு வரை தான் இவரால் ப‌டிக்க முடிந்தது. தன் பன்னிரண்டாவது வயதில் தன்னை விட 20 வயது மூத்தவருக்கு திருமணம் செய்து வைக்கப்பட்டார். இருபது வயதுக்குள் மூன்று ஆண் குழந்தைகளுக்கு தாயானார். மீண்டும் ஒன்பது மாத கர்ப்பிணியாக இருக்கும்போது கணவனால் எட்டி உதைக்கப்பட்டு வீட்டை விட்டு துரத்தப்பட்டார். அரை மயக்க நிலையில் மாட்டுத்தொழுவம் ஒன்றில் ஒரு பெண் குழந்தையைப் பெற்றெடுத்தார். தாய் வீட்டாராலும் புறக்கணிக்கப்பட்ட நிலையில் தெருக்களிலும் ரயில்வே பிளாட்பாரங்களிலும் பாட்டு பாடி பிச்சையெடுத்து வாழ ஆரம்பித்தார். பாதுகாப்பிற்காக இரவு நேரங்களில் சுடுகாட்டில் தங்கிக் கொள்வார். இறுதிச் சடங்குகளில் வாரி இரைக்கப்பட்ட தானியங்களை சேகரித்து அதை மாவாக்கி ரொட்டி செய்து எரிந்து கொண்டிருக்கும் சிதைகளிருந்த நெருப்பில் அதை சுட்டுத்தின்னும் அவல வாழ்க்கைக்கு தள்ள‌ப்பட்டார். எத்தனை அவலமான வாழ்க்கை அவருக்கு!

அதன் பின் தான் அவர் வாழ்க்கையில் திருப்பம் வந்தது. தன் பெண்ணை அநாதை பராமரிப்பு நிலைத்தில் விட்டு விட்டு, அநாதைக்குழந்தைகள் பலருக்காக இன்னும் கடுமையாக பிச்சையெடுக்க ஆரம்பித்தார். கிடைத்த பணம், நன்கொடைகளைக்கொண்டு அனாதை இல்லங்களை உருவாக்கினார். தன் வாழ்க்கையையே அநாதைகளைப் பராமரிக்க அர்ப்பணித்தார். 1050க்கும் மேற்பட்ட அநாதைக்குழந்தைக‌ளுக்கு இவர் அடைக்கலம் கொடுத்தார். விருது பணத்தில் மேலும் மேலும் நிலம் வாங்கி அநாதை விடுதி பராமரிப்பு பணிகளை விரிவு படுத்தி வருகிறார். தன்னால் வளர்க்கப்பட்ட குழந்தைகள் தங்கள் சொந்தக்கால்களில் நிற்கும் வரை அடைக்கலம் கொடுத்து வருகிறார். இவரால் வளர்க்கப்பட்ட பலர் வழக்கறிஞர்களாக, மருத்துவர்களாக இருக்கின்றார்கள். 

இவரது வாழ்க்கை வரலாற்றை அடிப்படையாகக் கொண்டு மராத்தி மொழியில் ' Mee Sindhutai Sabkal’ என்ற திரைப்படம் 2010 ஆம் அண்டில் வெளியானது. இந்த திரைப்படம் 54வது லண்டன் திரைப்பட விழாவில் திரையிடத்தேர்வானது. ' 1050 க்கும் மேற்பட்ட குழந்தைகளால் 'மாயி' [அம்மா] என்ற‌ழைக்கப்படும் சப்கலுக்கு 2016ம் ஆண்டு DY Patil Institute of Technology and research foundation கெளரவ டாக்டரேட் பட்டம் வழங்கி பெருமைப்படுத்தியிருக்கிறது. அன்னை தெரசா விருது, பத்மஸ்ரீ விருது உளபட 500க்கும் மேற்பட்ட விருதுகள் வழங்கப்பட்டு இவர் கெளரவப்படுத்தப்பட்டிருக்கிறார். ஃபீனிக்ஸ் பறவை சாம்பலிலிருந்து எழுவது போல குப்பைமேட்டிலிருந்து எழுந்து ஆயிரக்கணக்கான அனாதைக்குழந்தைகளை வாழ்க்கையில் உயர்த்தி மகத்தான சாதனை படைத்திருக்கும் இந்த உயர்ந்த பெண்மணியை வணங்குவோம்

 இசை முத்து:

ஏ.ஆர்.ரஹ்மானின் ' கண்ணாமூச்சி ஏனடா' பாடல் வயலினில் இங்கே இழைகிறது. அதுவும் நாட்டைக்குறிஞ்சி ராகத்தில் பிரபல வயலின் கலைஞர் ரூபா ரேவதி கரங்களால்! கேட்டு ரசியுங்கள்! 

முத்துக்குவியல்-62!!!

 உயர்ந்த முத்து:

இந்தியாவில் அதிக அளவில் இரத்த தானம் செய்தவர்களில் முதன்மையாக விளங்குபவர் ஷபீர்கான். 58  வயதான இவர் காஷ்மீரைச் சேர்ந்த ஸ்ரீநகரைச் சேர்ந்தவர். 41 ஆண்டுகளாய் இரத்த தானம் செய்து வரும் இவர் இது வரை 82 லிட்டர் ரத்தத்தை தானமாக வழங்கியிருக்கிறார். இவரின் தொன்டினால் ' காஷ்மீரின் ரத்த மனிதர்' என்று உயர்வாக அழைக்கப்படுகிறார். வருடத்திற்கு நான்கு அல்லது ஐந்து முறைகள் ரத்த தானம் செய்கிறார். காஷ்மீர் மட்டுமின்றி ஒடிசா, தமிழ்நாடு, புது டெல்லி, ஆந்திரா உள்பட நாட்டின் பல பகுதிகளுக்கு சென்று ரத்த தானம் செய்திருக்கிறார். 

2004ல் சுனாமி பாதித்த இடங்களுக்குஇரண்டு மாதங்களுக்கு மேலாகத் தொடர்பில் இருந்து ரத்த தான இயக்கங்களை வழி நடத்தியிருக்கிறார். இவர் இந்திய செஞ்சிலுவை இயக்கத்தின் வாழ்நாள் உறுப்பினர். காஷ்மீர் பள்ளத்தாக்கு பகுதியில் 2300 உறுப்பினர்களைக்கொண்ட தன்னார்வ இரத்த தான இயக்கக்குழுவினருக்கு தலைமை தாங்கி வருகிறார். இந்தக்குழு மூலம் ரத்த தானம் செய்வதற்கு பொதுமக்களை ஊக்கப்படுத்துவதுடன் போதைப்பொருள் எதிர்ப்புப் பிரசாரங்களையும் முன்னெடுத்து வருகிறார்.

நெகிழ வைத்த‌ முத்து:

இசைக்கலைஞர் எஸ்.பி.பாலசுப்ரமணியம் மறைந்து ஒன்பது மாதங்கள் கடந்து போய் விட்டன. என்னை மிகவும் பாதித்த மரணம் அவருடையது. 6 மாத‌ங்கள் வரை அவருடைய பாடல் நிகழ்ச்சிகள் எதையும் பார்க்காமலேயே இருந்தேன். நேற்று விஜய் டிவியில் முன்பு நடந்த சூப்பர் சிங்கர் நிகழ்ச்சியை எதேச்சையாக அதில் பரிசு பெற்ற சிறுவன் ஹ்ரித்திக் பாடியதைக் கேட்டேன். பாடகி கல்பனாவும் ஹிரித்திக்கும் ' ரோஜாவைத்தாலாட்டும்' பாடலை அசத்தலாக, அருமையாக பாடினார்கள். பாடல் முடிவில் கண்ணீர் விட்டு எஸ்.பி.பி அழுதார். உணர்ச்சி வயப்பட்ட குரலில் பேச ஆரம்பித்தார்.

 " நான் சில விஷயங்களை மனம் விட்டு சொல்லப்போகிறேன் இங்கு. மனமார ஒரு நல்ல பாட்டை பாராட்டாதவன் ஒரு நல்ல கலைஞனாக இருக்க முடியாது. கல்பனா அப்படிப்பட்ட சிறந்த பாடகி. நல்ல் மனசு இருக்கும் ஒரு மிஷின். எத்தனை முறை அவளை பாராட்டுவது? எதுக்கு சார் கண்ணுல கண்ணீர் வரணும் ஒரு அழகான பாட்டைக் கேட்கும்போது? ஒரு சின்ன பையன் அழகாகப் பாடும்போது எதுக்காக கண்ணீர் வரணும்? யாரவது இதற்கு பதில் சொல்ல முடியுமா? யாராலுமே சொல்ல முடியாத ஒரு அழகான எக்ஸ்பிரஷன் இது. மற்ற உணர்வுகளை வாயால் சொல்ல முடியும். இப்படிப்பட்ட விஷயங்களை மட்டும் சொல்வதற்குத்தான் கடவுள் கண்ணில் நீரைக் கொடுத்திருக்கார். இந்த மாதிரி ஒரு அருமையான கம்போஷிஷனைக் கேட்கும்போது, இந்த மாதிரி ஒரு சுண்டைக்காய் பையன் அனாயசமாகப் பாடும்போது, அது அப்படியே இதயத்திற்குள் போய் ஆத்மாவிலும் கலந்து கண்ணீராக வெளிப்படுகிறது. நானும் ஜானகியம்மாவும் எத்தனை நுணுக்கமான சங்கதிகளுடன் எவ்வளவு கஷ்டப்பட்டு இந்தப் பாட்டை பாடியிருக்கிறோம்! எத்தனை பரிசுகள், அவார்டுகள் வாங்கியிருக்கிறோம்! அபப்டிப்பட்ட பாடலை இந்த தம்மாத்துண்டு பையன் அருமையாக பாடியிருக்கிறான்! கடவுள் இருக்கிறார் என்பதற்கு இதை விட சாட்சி வேறென்ன வேண்டும்? " என்று முடித்தார்.

இதைக்கேட்ட என் கண்களிலும் கண்ணீர் வழிந்தது! ஒரு வளரும் பாடகனுக்கு இதை விட ஒரு சிறந்த பாராட்டுப்பத்திரம் வேறு யாராலும் கொடுக்க முடியாது. எப்படிப்பட்ட ஒரு சிறந்த மனிதரை, இசைக்கலைஞரை நாம் இழந்து விட்டோம்!

சாதனை முத்து:

அமெரிக்காவின் அரிசோனாவைச் சேர்ந்தவர் ஜெஸிகா காக்ஸ். பிறந்த போதே இரு கைகளும் இல்லாமல் பிறந்தவர். ஆனால் இந்த பெரிய குறைபாட்டை மனதில் ஏற்றி துவண்டு போகாமல் பல சிறந்த சாதனைகள் செய்து வாழ்க்கையில் ஜெயித்தவர்.

சிறு வயதில் விமானப்பயணத்தில் விமானிக்கு அருகே அமரும் வாய்ப்பு கிடைத்தபோது விமானம் மீதும் விமானியாக ஆவதற்கும் ஆர்வம் ஏற்பட்டது. கல்லூரிப்படிப்பை முடித்ததும் கடும் பயிற்சியை மேற்கொண்டு கடந்த 2008ம் ஆண்டு லைட் ஏர்ட் விமானத்தை இயக்கும் லைசென்ஸ் கிடைக்கப்பெற்றார்

இதனால் கைக‌ள் இன்றி கால்களால் விமானம் ஓட்டும் முதல் பெண்மணி என்னும் உலக சாதனை புரிந்தார். விமானம் ஓட்டுவது மட்டுமல்லாமல் கராத்தே, கார் ஓட்டுதல், சமையல் செய்தல் என்று அனைத்து துறைகளிலும் வலம் வருகிறார். உலகம் முழுவதும் தன்னம்பிக்கை பேச்சாளராக இன்றும் வலம் வருகிறார்.

ரசித்த முத்து:

கொரோனாவால் ஏற்பட்ட விபரீதங்கள், மரணங்கள், பிரச்சினைகள் இவற்றுக்கப்பால் கொரோனாவால் ஏற்பட்ட நன்மைகளைப்பற்றி ஒரு பள்ளிச் சிறுவனின் மனதில் எழ்ந்த கற்பனை இது! 

வாட்ஸ் அப்பில் வந்தது! படித்து முடித்ததும் நம்மையுமறியாமல் ஒரு சின்னப்புன்னகை எழுகிறது!!  

இசை முத்து:

இந்தப்பாடல் 1955ல் வெளி வந்த ' நல்ல தங்காள்' என்ற திரைப்படத்தில் இடம் பெற்றிருந்த இனிய பாடல்! 70 வருடங்களுக்கு முன் வந்த பாடல் என்பதால் எப்படியிருக்குமோ என்று உங்களுக்குத் தோன்றும். பாடலைக் கேட்டுப்பாருங்கள். டி.எம்.செளந்திரராஜன் அந்த அளவு இனிமையாக‌ப் பாடியிருப்பார். அண்ணன் தங்கை பாசத்திற்கு 'பாச மலர்' திரைப்படம் தான் எப்போதும் உதாரணம் காண்பிக்கப்படும். இந்தப்பாடல் அதற்கு முன் வெளி வந்த, ஒரு அண்ணன் தன் தங்கையை நினைத்து பாடும் பாடல்.

முத்துக்குவியல்-61!!!

 வணங்க வைக்கும் முத்து:

கேரள மாநிலம் திருவனந்தபுரத்தைச் சேர்ந்த லட்சுமிக்குட்டி அம்மா என்ற 74 வயதான காணி என்னும் பழங்குடி சமூகத்தைச் சேர்ந்த நாட்டு வைத்தியம் பார்க்கும் மூதாட்டியை வன முத்தச்சி என்று அப்பகுதியினர் செல்லமாக அழைக்கின்றனர். கல்வி கற்பதற்காக 1950களிலேயே மலையை விட்டு இறங்கி வந்திருக்கிறார் இவர். அந்தக் காலத்தில் இதையெல்லாம் நினைத்துக்கூட பார்க்க முடியாது. எட்டாம் வகுப்பிற்கு மேல் படிக்க அந்தப்பள்ளியில் வசதியில்லாத காரணத்தால் படிப்பை நிறுத்தி விட்டாலும் தன்னைப்படிக்க வைத்த பெற்றோரை இந்த 75 வயதிலும் நன்றியுடன் நினைத்துப்பார்க்கிறார். இயற்கையை நன்றியுடன் நினைத்துப்பார்க்க வலியுறுத்தும் இவர், தினமும் அதிகலையில் எழுந்து தானே தன் குடிசைக்கெதிரே கட்டமைத்திருக்கும்  கோவிலில் தீபமேற்றி வழிபாடு செய்து விட்டு அதிகாலையில் மூலிகைகள் பறித்து வர காட்டினுள் செல்லும் இவர் மூலிகைகளை வணங்கி அதன் பின்னரே பறித்தெடுத்து வருகிறார். " ஒவ்வொரு மூலிகையின் இளந்தண்டுகளின் நரம்புகள் மனிதனின் இரத்த நாளங்களுக்கு இணையானவை. அவைகளிலிருந்து வெளிப்படும் ஆற்றல் தான் நம் உடலுக்குள் பாய்ந்து குணப்படுத்துகிறது. என்னைப்பொறுத்தவரை, ஒவ்வொரு இலையும் மந்திரம். இந்த மூலிகை சிகிச்சை ஒரு தெய்வ வழிபாடு" என்று சொல்லும் இவர் ஒரு இலையைக்கூட அதிகமாகப்பறித்து வீணாக்காமல் தேவைக்கு வேண்டியதை மட்டும் பறிப்பதை ஒரு விரதமாகவே வைத்திருக்கிறார். 

தன் தாயிடம் கற்ற இந்த சிகிச்சை முறைகளை, சின்ன வயதில் பத்து கிலோ மீட்டர் நடந்து பள்ளிக்குச் சென்ற போது கூடவே துணையாக வந்து பதினாறு வயதில் விரும்பி திருமணம் செய்து கொண்ட தன் கணவர் தான் தொடர்ந்து ஊக்கப்படுத்தினார் என்று அன்புடன் நினைவு கூர்கிறார். மூன்று ஆண் குழந்தைகள், குடும்பம் என்று வாழ்ந்து கொண்டிருந்த போது, இளைய மகன் எதிர்பாராத விதமாக பாம்பு தீண்டி இறந்த போது தான் இனி இந்த துன்பம் இன்னொருவருக்கு நிகழக்கூடாது என்று தான் கற்றிருந்த மூலிகை சிகிச்சையை கையில் எடுத்தார். அன்றிலிருந்து இன்று வரை கடந்த 50 வருடங்களாக நானூறு பேர்களை பாம்புக்கடியால் இறக்கும் தருவாயில் இருந்தவர்களை உயிர் பிழைக்க வைத்திருக்கிறார். இன்னொரு மகன் யானை மிதித்து மரணமடைந்தார்.  தற்போது ரயில்வேயில் வேலை செய்து கொண்டிருக்கும் மூத்த மகன் தன்னுடன் வந்து இருக்குமாறு வற்புறுத்தியபோதும் ‘ இந்தக்காட்டில் தான் என் வாழ்வும் பாரம்பரியமும் இருக்கிறது’ என்று சொல்லி அவருடன் செல்ல மறுத்து விட்டார்.

தொடந்து தளராமல் சேவை செய்து வருகிறார். கடந்த 1995ல் லட்சுமி பாட்டியை கேரள அரசு ‘நாட்டு வைத்திய ரத்னம்’ என்ற விருதை அளித்து கவுரவித்தது.  8ம் வகுப்பு வரை மட்டுமே படித்தவர் இவர் கல்லார் பகுதியிலுள்ள நாட்டுப்புற கலை பண்பாட்டு மையத்திற்கு சென்று அங்குள்ள மாணவர்களுக்கு வகுப்புகளும் எடுப்பது உண்டு. மேலும் திருவனந்தபுரம் நெடுமங்காடு மற்றும் அதன் சுற்றுப்புற பகுதிகளில் கலாசார நிகழ்ச்சிகளுக்கு சென்று உரையாற்றுவதும் இந்த லட்சுமி பாட்டியின் வழக்கம். இந்திய அரசின் உயரிய பத்மஸ்ரீ விருதும் இவருக்கு வழங்கப்பட்டிருக்கிறது! இவரது கைவசம் 500க்கும் மேற்பட்ட நாட்டு சிகிச்சை முறைகள் உள்ளன. 

இந்த லட்சுமி பாட்டியிடம் அப்படி என்ன விஷயம் இருக்கிறது என்பது குறித்து தெரிந்து கொள்வதற்காகவும், அவரிடமிருந்து வைத்திய முறைகளை அறிந்து கொள்வதற்காகவும் மாணவர்கள், மருத்துவ ஆராய்ச்சியாளர்கள் என தினமும் ஏராளமானோர் வந்து கொண்டிருக்கின்றனர். அனைவரிடமும் தனக்கு தெரிந்த விஷயங்களை பகிர்ந்து கொள்வதில் எந்த தயக்கமும் காட்டுவதில்லை இவர். திருவனந்தபுரம் நகரிலிருந்து சுமார் 45 கி.மீ. தொலைவில் பொன்முடி செல்லும் வழியில் கல்லார் என்ற இடத்தில் நடுக்காட்டில் தான் இந்த பாட்டியின் குடில். சரியான சாலையே இல்லாத காட்டுக்குள் இருக்கும் தன் குடிசைக்கு வைத்தியத்திற்காக வருபவர்களுக்கு துளசி நீரும் வேக வைத்த காட்டுக்கிழங்குகளும் உணவாகத் தருவது இவர் வழக்கம். தனது மருத்துவத்தை தற்சமயம் முறைப்படுத்தி, ஆவணப்படுத்தும் முயற்சியில் அமிர்த பலா, காட்டு முல்லை என்ற பெயர்களில் ஆய்வுகளை மேற்கொண்டு வரும் கேரள அரசுக்கு முழு ஒத்துழைப்பையும் வழங்கி வருகிறார். தொடர் விருதுகளுக்குப்பின் இவரைத்தேடி வருபவர்களின் எண்ணிக்கை அதிகமாயிருந்தாலும் இன்னும் தளராமல் இவர் உழைத்து வருகிறார்.இந்த அருமையான பெண்மணியை வணங்கி வாழ்த்துவோம்!  

உயர்ந்த முத்து:

இந்திய கிரிக்கெட் அணியில் குறுகிய காலத்தில் பிரபலமடைந்தவர் டி.நடராஜன். தமிழகத்தின் சேலம் மாவட்டம் சின்னப்பட்டியை சேர்ந்தவர். ஏழ்மை நிலையில் வளர்ந்தவர். 

தந்தை நெசவு வேலையில் தினக்கூலி. தாயார் தள்ளுவண்டியில் உணவு விற்பனை செய்து வந்தார். ஐந்து குழந்தைகளில் மூத்தவரான நடராஜன் கடந்த ஆண்டு ஐக்கிய அரபு அமீரகத்தில் நடைபெற்ற ஐபிஎல் தொடரில் தனது சிறப்பான பந்து வீச்சின் மூலம் எதிரணி வீரர்க ளை வீழ்த்தி புகழ் பெற்றார். யார்க்கர் பந்துவீச்சில் அசத்தி வரும் நடராஜன், டி20 போட்டிகளில் இறுதிகட்ட ஓவர்களில் அசத்தலாக பந்து வீசி வெற்றியை தேடி கொடுத்துள்ளார்.

ஆஸ்திரேலிய அணிக்கு எதிரான பிரிஸ்பேன் டெஸ்ட் போட்டியில் நன்றாக விளையாடிய இளம் வீரர்களான நடராஜன், வாஷிங்டன் சுந்தர், ஷர்துல் தாக்கூர், சிராஜ், நவ்தீப் சைனி, சுப்மன் கில் ஆகியோரை ஊக்கப்படுத்தும் விதமாக பிரபல மஹிந்திரா நிறுவனத்தின் உரிமையாளர் ஆனந்த் மஹிந்திரா கார் பரிசாக அளிக்கப்படும் என்று கடந்த ஜனவரி அறிவித்திருந்தார். அதன்படி எல்லோருக்கும் கார் பரிசாக சில தினங்களுக்கு முன்பு அளிக்கப்பட்டது.

இத்தனை ஏழ்மையான சூழ்நிலையிலிருந்து வந்து, புகழ் பெற்றாலும் உடனே வானத்துக்குப் பறக்காமல் தன் மனதில் நன்றியுணர்ச்சியை செயலில் காட்டியிருக்கிறார் நடராஜன்.  தனக்கு மஹிந்திரா நிறுவனம் வழங்கிய தார் காரை தனது பயிற்சியாளரும் தன்னை ஊக்கப்படுத்தி வருபவருமான ஜெயப்பிரகாஷுக்கு பரிசளித்து,  நெகிழ்ச்சியூட்டியிருக்கிறார் நடராஜன்.

இசை முத்து:

இந்தப்பாடல் கவிஞர் வாலியால் எழுதப்பட்டு இசை ஞானி இளையராஜாவால் இசையமைக்கப்பட்டு, கே.ஜே.ஜேசுதாஸ், திருமதி.கே.எஸ்.சித்ரா இருவராலும் பாடப்பட்டது.. இருவருமே இந்தப்பாடலை போட்டி போட்டுக்கொண்டு பாடியிருப்பார்கள். பாடலின் முதல் பகுதி கர்நாடக தேவகாந்தாரி ராகத்தில் தொடங்கி நடுவில் பாகேஸ்ரீ ராகத்தில் தவழ்ந்து கடைசி பகுதி சுமனேஸரஞ்சனி ராகத்தில் மிதந்து முடியும். கேட்டு ரசியுங்கள். இதில் சுபஸ்ரீ தணிகாசலாம் இந்தப்பாடலின் இனிமையில் மயங்கிப்போய் சொல்கிற மாதிரி, நாமும் "கேட்கலாம், கிறங்கலாம் "! ' 

முத்துக்குவியல்-60!!!

 

சிந்திக்க வைத்த முத்து: 

நேற்று ஒரு இயற்கை மருத்துவர், Drug free diabetic club நடத்துபவர் யு டியூபில் பேசிய விஷயம் என்னை மிகவும் சிந்திக்க வைத்தது. சர்க்கரை நோய் பற்றி அவர் நிறைய பேசினார். ' இன்றைக்கு எந்த சர்க்கரை நோய் நிபுணரிடம் சென்றாலும் நமது இரத்தத்தில் இருக்கும் சர்க்கரைக்கேற்ப அவர்கள் மாத்திரைகள் கொடுப்பதுடன் நாம் பின்பற்ற வேண்டிய தினசரி உணவுப்பட்டியல் ஒன்றையும் கொடுக்கிறார்கள். அதன்படி  நாம் காலையில் 3 இட்லி அல்லது 2 சப்பாத்தி, மதியம் ஒரு கப் சாதம்+நிறைய காய்கறிகள், இரவிலும் அதே 3 இட்லி அல்லது 2 சப்பாத்தி வேண்டும். . இந்த உணவுப்ப‌ட்டியலைத்தானே சர்க்கரை நோயாளிகள் தினமும் கடைபிடிக்கிறார்கள்? மாவுச்சத்தை நிறுத்தாமல் குறைக்காமல் தினமும் சாப்பிட்டால் இதில் எப்படி சர்க்கரை குறையும்? நமக்குத்தேவை தினமும் 50 கிராம் கார்போஹைட்ரேட். ஆனால் காலை, மதியம், இரவு என்று நாம் 100 கிராம் மாவுச்சத்தை சாப்பிடுகிறோம். இப்படி சாப்பிட்டாலும் சர்க்கரை கூடத்தானே செய்யும்? சர்க்கரை நோய் மருத்துவர்கள் மாவுச்சத்தை குறைத்து புரதம், கொழுப்பு அதிகமான மெனுவைத்தானே சாப்பிட வற்புறுத்த வேண்டும்? ' என்று சொன்ன போது அதிச்சியாக இருந்தது. நானும் நாலைந்து வருடங்களுக்கு முன் இதைத்தானே கடைபிடித்தேன்? மனம் விழித்துக்கொண்ட போது மாத்திரைகள் சாப்பிட ஆரம்பித்து பல வருடங்களாகியிருந்தன.. இந்த மெனுப்படி, தினமும் உணவு எடுத்துக்கொள்ளும்போது சர்க்கரை கூடத்தானே செய்யும்?

அதற்கேற்றாற்போல மாத்திரைகளும் கூடத்தானே செய்யும்? அதிக மாத்திரைகளால் சிறுநீரகமும் மெல்ல மெல்ல கெடத்தானே செய்யும்? இதென்ன மருத்துவ முறை? மாவுச்சத்து மிக மிக குறைவாக உள்ள உணவுப்பட்டியலைத்தானே மருத்துவர்கள் பரிந்துரைக்க வேண்டும்? அரிசி சாதத்தை பரிந்துரைக்கும் மருத்துவர் கூட பாலிஷ் செய்யப்படாத அரிசியை பரிந்துரைக்கவில்லையே? 

அசத்திய முத்து: 

ஷில்பா பிரபாகர் சதீஷ் திருநெல்வேலியின் முதல் பெண் கலெக்டர். பல அரசு விருதுகளுக்கு சொந்தக்காரர். தன் பெண்ணை அரசு அங்கன்வாடியில் சேர்த்து அதிரடி காட்டியவர். .கர்நாடகத்தைச்சேர்ந்த இவருக்கு சமீபத்தில் திருநெல்வேலி மாவட்டத்திற்காக மத்திய அரசின் ' தூய்மை இந்தியா திட்ட சிறப்பு விருது' கிடைத்திருக்கிறது.

 திருநெல்வேலி முழுவதும் கட்டப்பட்டிருக்கும் சமுதாயக் கழிவறைகளை சரியாக‌ பராமரித்து முறையான பயன்பாட்டுக்கு கொண்டு வந்ததற்காக இந்து விருது கிடைத்துள்ளது. மீனவப்பெண்களுக்கும் கிராமப்பெண்களுக்கும் காணி பழங்குடியினருக்கும் பல விதங்களில் உதவி செய்து வருகிறார். தற்போது சென்னையில் சுகாதார குடும்ப நல திட்ட அலுவலகத்தில் இணை செயலாளராக இருக்கிறார். 

அபாய முத்து: 

பிரான்ஸ் நாட்டின் தென் மேற்கு மூலையிலுள்ள ஒரு கிராமத்தில் 80 வயது பெரியவர் ஒருவர் தன்னை சுற்றி சுற்றி வந்து ரீங்காரமிட்ட ஒற்றை ஈயை கொல்ல மின்சார ராக்கெட் ஒன்றை உபயோகித்திருக்கிறார். அப்போது வீட்டிலிருந்த சமையலறையில் இருந்த எரிவாயு சிலிண்டரில் இலேசாக கசிவு ஏற்பட்டிருப்பது அவருக்குத் தெரியவில்லை. 

மின்சார ராக்கெட்டை உபயோகிக்கத் தொடங்கியதுமே வீட்டின் சமையலறை வெடித்து சாம்பலானது. இலேசான காயங்களுடன் அவர் தப்பி விட்டார். ஆபத்துக்கள் எந்தெந்த வடிவில் எல்லாம் வருகிறது!! மின்சார ராக்கெட்டை உபயோகத்தில் வைத்திருப்பவர்கள் கவனமாக இருக்கவும். 

இசை முத்து: 

என்னுடைய all time favourite-என்றைக்குமே என் மனதில் முதலிடத்தில் இருக்கும் பாட்டு இது. சுத்த தன்யாசி ராகத்தில் சுசீலா தன் தேன் குரலில் மயங்க வைப்பார். அதனாலேயே ராகங்களில் எனக்கு மிகவும் பிடித்த ராகமாக ‘ சுத்த தன்யாசி ‘ ஆகி விட்டது. ஆச்சரியம் என்னவென்றால், எப்போது இந்தப்பாட்டைக் கேட்டாலும் அதன் இனிமைக்கு முன்னால் வேறு எதுவும் மனதுக்கு அந்த சில நிமிடங்களில் புலப்படுவதில்லை. அந்த மாதிரியான பாதிப்பை இன்றைக்கும்கூட இந்தப் பாட்டு உண்டாக்குகிறது!! கர்ணன் திரைப்படத்தில் வரும் ‘ கண்கள் எங்கே? நெஞ்சமும் எங்கே? ‘ பாடல் தான் அது. பொதுவாக வெகு சிலரே அதே இனிமையுடன் பாடுவார்கள். எல்லோராலும் இதை அத்தனை எளிதாக பாடி விட முடியாது. அப்படி ஒரு பெண் மிக இனிமையாக இந்தப்பாடலைப் பாடியிருக்கிறார். கேட்டு ரசியுங்கள். இந்தப்பாடல் உருவாக தில்ரூபா, ஷெனாய், சந்தூர் போன்ற இசைக்கருவிகள் உபயோகிக்கப்பட்டதாம். பாடல் ஆரம்பிக்கும் முன் தொலைக்காட்சியில் அதிகமான இசை நிகழ்ச்சிகள் நடத்தி வரும் திருமதி சுபஸ்ரீ தணிகாசலம் இந்தப்பாடல் உருவான விதம் பற்றி இன்னும் நிறைய சொல்லுகிறார்.

 

முத்துக்குவியல்-59!!!

 பெருமித முத்து:

அமீரகத்தில் இந்து கோவில்:

கடந்த 2015ல் அமீரகத்திற்கு முதல்முறையாக பிரதமர் மோடி வந்த போது, அமீரகத்தில் வசிக்கும் இந்து மகக்ளுக்காக அவரின்  வேண்டுகோளுக்கு இணங்க ஐக்கிய அமீரகக் குடியரசின் தலநகர் அபுதாபியில் இந்து கோவில் கட்டுவதற்காக அமீரக அரசு சார்பில் அனுமதி அளிக்கப்பட்டது. அபுதாபியின் பட்டத்து இளவரசரின் உத்தரவுப்படி துபாய் அபுதாபி ஷேக் ஜாயத் சாலையில் அல் ரக்பா என்னும் இடத்தில் உள்ள அல் முரைக்கா என்ற இடத்தில் 25000 சதுர அடி இடம் கோவில் கட்டுவதற்காக ஒதுக்கப்பட்டது. அதன் பின் இக்கோவில் அடிக்கல் நாட்டு விழா 2018ல் பிரதமர் மோடி மீண்டும் வந்த போது நடைபெற்றது. இதைப்பற்றி முன்னரேயே எழுதியிருந்தேன்.

இந்தக் கோவில் கட்டும் பொறுப்பு குஜராத் மாநிலத்தில் பாப்ஸ் என்ற அமைப்பு ஏற்றுக்கொண்டுள்ளது. கடந்த பிப்ரவரி மாதம் 27 ஏக்கர் பரப்பளவில் இந்தக் கோவிலின் கட்டுமானப்பணிகள் தொடங்கப்பட்டன. சாதாரண கம்பி கான்க்ரீட் என்றில்லாமல் கற்கள் அடுக்கி வைக்கப்பட்டு பாரம்பரிய முறையில் கட்டுமானப்பணிகள் நடைபெற்று வருகிறது. இந்தக்கோவிலுக்காக கல்தூண்கள், சிற்பப்பணிகள் இந்தியாவில் நடைபெற்று வருகின்றன. இதுவரை 707 கனமீட்டட் அளவுள்ள பாறைகள் குடையப்பட்டு சிற்பங்கள் செய்யப்பட்டு வருகின்றன. 

இந்து மததின் புராண இதிகாசங்களின் நிகழ்வுகள் சிற்பங்களாக உருவாகி வருகின்றன. இந்த சிற்பங்கள் செதுக்கும் பணியில் இதுவரை 2000 கலைஞர்கள் ஈடுபட்டு வருகிறார்கள். இப்போது முடிவடையும் தருவாயில் உள்ள சிற்பங்கள் கப்பல்கள் மூலம் அபுதாபிக்கு எடுத்து வரப்பட்டு கோவிலில் பொருத்தப்படும். 

அடுத்த ஆண்டு 2021 மார்ச் இறுதிக்கும் இந்தக்கோவில் சிற்பங்கள் பொருத்தும் பணிகள் முடிவடைந்து விடும் என்று எதிர்பார்க்கப்படுகின்றது.

அதற்குள்ளாகவே சர்வதேச அளவிலான 2020ம் ஆண்டுக்கான ‘ வர்த்தக ரீதியிலான சிறந்த வடிவமைப்பு விருது’ இக்கோவிலைக் கட்டி வரும் பாப்ஸ் அமைப்பிற்கு கிடைத்துள்ளது. ஏற்கனவே இந்து கோவிலின் கட்டுமானத்தில் சிறந்த எந்திர வடிவமைப்பிற்காக இந்த அமைப்பு விருதினைப்பெற்றுள்ளது. இப்போது 2-வதாக இந்த விருது கிடைத்துள்ளது.

சாதனை முத்து:

தஞ்சாவூருக்கும் புதுக்கோட்டைக்கும் இடையேயுள்ள ஆதனக்கோட்டை கிராமத்தைச் சேர்ந்தவர் ஜெயலக்ஷ்மி. அங்குள்ள அரசுப்பள்ளியில் ப்ளஸ் டூ படிக்கிறார். சென்ற வருடம் தனியார் நிறுவனம் ஒன்று நடத்திய விண் அறிவியல் போட்டியில் வெற்றி பெற்று, அமெரிக்காவின் 'நாசா'வுக்குச் செல்ல நாடு முழுவதும் தேர்ந்தெடுக்கப்பட்ட 4000 மாணவர்களில் இவரும் ஒருவர். மிகவும் ஏழ்மையில் இருக்கும் இவருக்காக, இவர் நாசா செல்வதற்காக‌ மாவட்ட நிர்வாகம், தொண்டு நிறுவனங்கள் அனைவரும் உதவ முன் வந்தார்கள். அது போல ' கிராமாலயா' என்ற தொண்டு நிறுவனம் இவருக்கு உதவ முன் வந்த போது, ஏற்கனவே அமெரிக்கா போவதற்கான உதவிகள் அனைத்தும் கிடைத்த நிலையில் வேறுமாதிரியான உதவி ஒன்றை இவர் கேட்டார். 

முந்திரிக்காடுகள் நிறைந்த இவர் கிராமத்தில் முந்திரிக்கொட்டைகளை வறுத்தெடுத்து அதிலிருந்து பருப்பை பிரித்தெடுத்து சாலையோரமாய் விற்பது தான் இந்த கிராமத்து மக்களின் தொழில். மிகவும் பின் தங்கிய இந்த கிராமத்தில் இருக்கும் ஓட்டு வீடுகளில் கழிப்பறை கிடையாது. காட்டுப்பக்கம் தான் அதற்கு ஒதுங்க வேண்டும். அதுவும் பெண்களுக்கு இது மிகப்பெரிய அவஸ்தை. ' எங்கள் வீடுகளுக்கு கழிப்பறைகள் கட்டித்தர முடியுமா' என்று இவர் கேட்டார். அத‌ற்கு அந்த ' கிராமாலயா' நிறுவனம் ஒத்துக்கொண்டு 125 கழிப்பறைகளை கட்டிக்கொடுத்திற்கிறது!! இந்த மிகப்பெரிய சாதனையை செய்த இந்த ஏழைச்சிறுமியை பாராட்டுவதா அல்லது திறந்த மனதுடன் இந்த மாபெரும் உதவியைச் செய்த 'கிராமலாயாவைப் பாராட்டுவதா என்று தெரியவில்லை.

இந்த வருடம் மே மாதம் நாசா செல்ல வேண்டியவர் கொரோனாவால் செல்ல முடியவில்லை. அதனால் அடுத்த வருடம் நாசா செல்லவிருக்கிறார் ஜெயலக்ஷ்மி!

தகவல் முத்து:

கண் தானம்:

தானமாகப்பெறக்கூடிய கண்களிலிருந்து கருவிழியை மட்டும் முறையாக அகற்றி, கருவிழி நோயினால் பாதிக்கப்பட்டு பார்வையிழந்தவரின் கருவிழியை மாற்றி அறுவை சிகிச்சை செய்வதே கண் தானத்தின் மூலம் நடைபெறுகிறது. கருவிழி நோயினால் பாதிக்கப்பட்டு பார்வையிழந்தவர்களுக்கு மட்டுமே கண் தானத்தின் மூலம் கருவிழி மாற்று அறுவை சிகிச்சை செய்து பார்வை வழங்க முடியும். மற்ற பார்வையிழப்புகளுக்கு கண் தானம் மூலம் பெறக்கூடிய கண்களின் மூலம் தீர்வளிக்க முடியாது. 

ரத்த அழுத்தம் உள்ள நோயாளிகள், இருதய நோயாளிகள், வயோதிகம், பக்கவாதம், நீரிழிவு மற்றும் ஆஸ்துமா போன்ற நோயினால் பாதிக்கப்பட்டவர்கள் கண் தானம் செய்யலாம். கண் புரை அறுவை சிகிச்சை செய்தவர்களும் கண் தானம் செய்யலாம். 

அரவிந்த் கண் வங்கி,மதுரை: 0452-4356100

அரவிந்த் கண் வங்கி,கும்பகோணம்: 98428 20007

முத்துக்குவியல்-58!!

அதிசய முத்து:
   
அமெரிக்காவின் வடக்கேயுள்ள வடக்கு அலாஸ்காவில் உள்ள பரோ என்னும் நகரம்[ utqiagvik] டிசம்பரில் ஒவ்வொரு வருடமும் இருளில் மூழ்குகிறது. மார்ச் முடிய சூரியனைக்காணாமல் இருளிலேயே மூழ்கியிருக்கும் இந்த நகரம் சுமார் 4000 மக்கள் வாழும் நகரம். நார்மல் வெப்ப நிலை அந்த சமயத்தில் சைபருக்கும் கீழே செல்லுகிறது.  இந்த நகரத்தில் கிடைக்கும் எண்ணெய் வளமும் ஆய்வுகள் ஆராய்ச்சிக்கூடங்களும் மக்களை எப்போதும் வசதியாக வாழ வைக்கிறது. சுமார் 67 நாட்களுக்கு சூரியன் உதிக்காமல் இருக்கும் இந்த நகரம்.

 67 நாட்களுக்குப்பிறகு முதல் சூரிய வெளிச்சம் வரும்போது சூரியனின் ஒரு சிறு பகுதி மட்டும் தான் தெரியுமாம். அது ஒரு மணி நேரம் மட்டுமே நீடிக்கிறது. ஒவ்வொரு நாளும் இந்த சூரிய வெளிச்சமும் வெப்பமும் 20 நிமிடங்கள் கூடுமாம். இப்படியே அதிகரித்து அடுத்த வாரம் சூரிய வெளிச்சம் 4 மணி நேரம் நீடித்திருக்குமாம். இப்படியாக கூடி, மே மாதம் இரண்டாம் வாரத்திலிருந்து ஆகஸ்ட் வரை இரவு நேரத்திலும் மறையாது சூரியன் இருப்பதால் ‘ நள்ளிரவு சூரிய நகரம்’ என்றும் இந்த நகரம் அழைக்கப்படுகிறது.  ஆகஸ்ட் மாத நடுவில் சிறிது சிறிதாக அஸ்தமனம் ஆரம்பிக்கிறது. முதல் சில நாட்கள் சில மணி நேரங்கள் மட்டுமே இருளில் மூழ்கும் நகரம் படிப்படியாக சூரிய வெளிச்சம் குறைந்து நவம்பர் இறுதியில் இருளில் மூழ்குகிறது.

சிரிப்பு முத்து:

டாம் என்ற பூனையும் ஜெர்ரி என்ற எலிக்குமான சண்டைகள் கார்ட்டூன்களாக எழுபதுகளில் தொலைக்காட்சிகள் அனைத்திலும் வந்து புகழ் பெற்றது. இப்போதும்கூட அதன் வீடியோக்களை மக்கள் அவ்வப்போது பார்த்து ரசிப்பதுண்டு. அந்த அளவிற்கு அவற்றின் தாக்கம் மக்களிடம் இப்போதும்கூட இருக்கிறது. இந்த வீடியோ இந்தியாவிற்கும் சைனாவுக்குமான பிரச்சினைகளை மையமாக வைத்து தயாரித்து சிரிக்க வைத்துள்ளார்கள். நான் மிகவும் ரசித்தேன். நீங்களும் ரசியுங்கள்.

கவிதை முத்து:

இப்படியும் கூட கவிதை எழுதலாம். இந்த காலத்து சிறுவர்களின் கற்பனை திகைக்க வைக்கிறது!வாட்ஸ் அப்பில் வந்தது.

இசை முத்து:

சங்கர் மஹாதேவன் பாடிய ‘ உன்னைக் காணாது நான் “ பாடல் தனை எல்லோரும் கேட்டு ரசித்திருப்பீர்கள். அதில் பல குரல்கள், பல வாத்திய இசைகள் சங்கர் மகாதேவனோடு கூடவே இழைந்து நம்மை மெய்மறக்க வைக்கும். இதன் கீழே ஒருவர் ‘ என்ன அழகு என் தமிழ்! என் தமிழ் நதி போல எல்லாவற்றையும் தன்னோடு சேர்த்துக்கொள்ளும்’ என்று குறிப்பிட்டிருப்பார். அது தான் உண்மை! அதோடு ஸ்வரங்களும் இணையும்போது மொழிக்கும் தேசத்துக்கும் அப்பாற்பட்ட இசை இழைந்து நம்மையும் மயக்குகிறது.

முத்துக்குவியல்-57!!!

ரசித்த முத்து:

கவிஞர் கருணானந்தம் அவர்கள் ஒரு பாவலர் ஆவார். இவரின் படைப்புகளை 2007 - 08 இல் தமிழ் நாடு அரசு நாட்டுடைமை ஆக்கியது. கருணானந்தம் அவர்கள் 15.10.1925 இல் பிறந்தார். இருபதாம் நூற்றாண்டின் மறுமலர்ச்சிக் கவிஞர்களுள் ஒருவர். தஞ்சை மாவட்டம் சுங்கம் தவிர்த்த சோழன் திடல் என்னும் ஊரைச் சார்ந்தவர். அஞ்சலகப் பணியாளராகத் தொடங்கிப் பின்னாளில் தமிழக அரசுச் செய்தித் துறையில் துறை இயக்குநராகப் பணியாற்றியவர். மிகச்சிறிய தலைப்புகளை வைத்து கருத்து மிக்க பாடல்கள் இயற்றியவர். ' படி ' என்னும் தலைப்பில் ஒரு பாடல் இங்கே!!!

படி படியென்றே தலையில் அடித்துக்கொண்டார்;
     பள்ளி விட்டுக் கல்லூரிப்படி மிதித்தேன்!
" ஏற்றிவிடும் ஏணிக்குப் படிகள் உண்டா"
     ஏறிய பின் இப்படியும் சில பேர் கேட்பார்!
போற்றியவர் குளறுபடிக்கொள்கையாலே
     புளுகுகின்ற படியாகிப்புழுதி வாரி
தூற்றிடுவார் பெரும்படியாய்! மாடி மீதில்
     தூக்கி விடும் மின் தூக்கி பழுதாய்ப் போனால்
மாற்று வழி சுழற்படி தானன்றோ? என்றும்
    மறவாதபடியிருப்போம் படிக்கட்டைத்தான்!
கரும்படி உன் சொல்லெனக்குக் காரிகையே,
    கண்டபடி உளறாதே! கடைக்கண் வீசித்
திரும்படி என் கன்னத்தில் இதழ் படிந்தே
    தித்திக்கும்படியாக படித்தேன் ஊறி
வரும்படியாய் முத்திரையும் தருவாய் என்றால்
    வளைவாயிற்படி வரைக்கும் வருவாள், செல்வாள்
" துரும்படி என் மாற்றாரின் பகைமையெல்லாம்!
     தூளாகும் படிமுறிப்பேன், பார் பார்" என்பான்!

ஆச்சரிய முத்து:

சமீபத்தில் எங்கள் தண்ணீர் தொட்டியில் அரையடி நீளத்தில் ஒரு பாம்பு நீச்சலடித்துக்கொண்டிருந்தது. தண்ணீரின் அளவைப்பார்க்க தொட்டியின் கதவைத்திறந்த என் கணவர் பாம்பைப்பார்த்ததும் அடுத்த வீட்டு நண்பரை அழைத்துக்கொண்டு வாளி, கம்பு, என்று ஆயுதங்களை எடுத்துக்கொண்டு பல முயற்சிகள் செய்தும் பாம்பை பிடிக்க முடியவில்லை.

மாடியில் வேலை செய்து கொண்டிருந்த கொத்தனாரை அழைத்ததும் அவர் கையாலேயே அதைப்பிடித்து கொஞ்சம் தூரம் சென்று அதை விட்டு விட்டு வந்தார். அதன் பெயர் செவிட்டு பாம்பாம். மனிதர்கள் காதில் புகுந்து கொண்டு ஒரு வழி பண்ணி விடுமாம். என் கணவருக்கு ஆச்சரியமாக இருந்தது. அவர்களும் கிராமத்தில் பிறந்து வளர்ந்தவர்கள். ஆனால் இப்படியொரு பாம்பைப்பற்றி கேள்விப்பட்டதில்லை என்றார்கள்! யாராவது இந்தப்பாம்பு பற்றி கேள்விப்பட்டதுண்டா?

அசத்தும் முத்து:

ஆட்டோமியம் என்ற இந்த கட்டிடம் பெல்ஜியத்தின் தலைநகரான Brussels-ல்  அமைந்துள்ளது. 1958ல் அங்கே உலகப்பொருட்காட்சி நடந்த போது அதற்கு சில வருடங்களுக்கு முன் நடந்த உலகப்போரில் அணுகுண்டுகள் ஜப்பானில் வீசப்பட்டதை ஒட்டி ‘ அணுவை’ மூலப்பொருளாக வைத்து இந்த கட்டிடத்தை வடிவமைக்கலாம் என்று முடிவு செய்தார்கள்.  அதன்படி இதில் ஒன்பது கோளங்கள் சேர்க்கப்பட்டது. இது இரும்புத்தாதில் உள்ள 9 அணுக்களைக்குறிக்கும். ஒவ்வொரு அணுவும் பல கோடி மடங்கு பெரிதாக்கப்பட்டது. ஒவ்வொன்றும் 60 அடி விட்டமுள்ளது. குழாய்கள் மூலம் இவற்றை இணைத்தனர்.

அணுகுண்டு ஜப்பானை அழித்ததால் இதைக்கட்டுவதற்கு பலத்த எதிர்ப்பு கிளம்பியதாம். ஆனாலும் அணுவை ஆக்கப்பூர்வமாகக்காட்டவென்றே இதைக்கட்டுவதாக பெல்ஜியம் கூறி இதைக்கட்டியது. இதில் ஒரு கோளத்திலிருந்து இன்னொரு கோளத்திற்கு செல்ல எஸ்கலேட்டர்கள் அமைக்கப்பட்டன. ஒவ்வொரு கோளமும் ஒவ்வொரு உபயோகத்திற்கு ஒதுக்கப்பட்டது. உயரத்தில் உள்ல கோளத்தில் அங்கிருந்தே ப்ரஸ்ஸல்ஸ் நகரை முழுவதும் பார்க்கும்படியாக உணவகம் அமைக்கப்பட்டிருக்கிறது.  மக்கள் தங்குவதற்கேற்ற அறைகள் இன்னொரு கோளத்தில் அமைக்கப்பட்டன. 120 மீட்டர் உயரமுள்ள இந்த கட்டிடம் கட்டி முடிக்க 3 வருட்ங்கள் தேவைப்பட்டன். கண் கவரும் ஒளி விளக்குகள் சுற்றுலாப்பயணிகளின் கவர்வதெற்கென்றே நிர்மாணிக்கப்பட்டுடுள்ளன.

இசை முத்து:

ரூபா ரேவதி ஒரு மலையாளி. சிறந்த பாடகி மட்டுமல்ல, அருமையாக வயலின் வாசிப்பவர். சமீபத்தில் வெளி வந்த ' பிகில்' படத்தில் ஏ.ஆர்.ரஹ்மானின் இசையமைப்பில் வெளி வந்த‌ இனிமையான பாட்டான ' உனக்காகவே நான் வாழ்கிறேன் ' என்னும் பாடலை மயங்கும் வித்தத்தில் வாசித்திருக்கிறார். கேட்டு ரசியுங்கள்!

முத்துக்குவியல்-56!!!!

அசத்தும் முத்து:

டெனித் ஆதித்யா என்னும் 16 வயது தமிழக மாணவர் சாதனைகள் படைத்திருக்கிறார். நான்காம் வகுப்பு படிக்கும்போது கணினி பயில ஆரம்பித்தவர் இந்த பதினாறு வயதில் 35 computer applications முடித்திருப்பதுடன் 6 மொழிகளையும் கற்றுத்தேர்ந்திருக்கிறார்.

19 கண்டுபிடிப்புகளுக்கு  சொந்தக்காரராய் இருப்பதுடன் 17 சர்வ தேசீய விருதுகளையும் 10 தேசீய விருதுகளையும் 10 மாநில விருதுகளையும் பெற்றிருக்கிறார். 3 கின்னஸ் சாதனைகளுக்கு முயன்றவர். ஒரு கின்னஸ் சாதனையை தன் வசம் வைத்திருப்பவர்.

5 நிறுவனைங்களின் தலைமை பொறுப்பில் இருப்பவர். சொந்த ஊர் விருதுநகர் மாவட்டம் வத்திராயிருப்பு.

வாழையிலை யை வெட்டி விட்டால் சாதாரணமாக 3 நாட்களில் வாடி விடும். 3 ஆண்டுகள் வரை வாழையிலை வாடாமல் காக்கும் அறிவியல் தொழில் நுட்பத்தை இவர் தன் 11வது வயதில் கண்டு பிடித்தார். இவர் கண்டுபிடிப்பால் வாழையிலையின் உறுதித்தன்மையும் நெகிழ்வுத்தன்மையும் அதிகரிக்கும். இதைக்கொண்டு தட்டுகளும் குவளைகளும் செய்யலாம் என்கிறார். இதில் வேதியல் பொருட்கள் பயன்படுத்துவதில்லை என்பதால் இந்த வாழையிலைகள் ஆரோக்கியமானவை மட்டுமல்ல, மலிவானதும் கூட. மேலும் பிளாஸ்டிக் பிரச்சினைக்கு இதுவே சரியான தீர்வு என்கிறார் இவர். இதற்கு இவர் காப்புரிமை பெற்றிருக்கிறார். இந்த கண்டு பிடிப்பிற்காக 2 தேசீய விருதுகளையும் 7 சர்வ தேச விருதுகளையும் பெற்றிருக்கிறார். இந்தியாவின் ‘ innovation scholar’ விருதை முதன்முறையாக பெற்றவரும் இவரே. 45 நாடுகளுக்கு இவர் சென்றுள்ளார். ஐந்து சர்வதேச அறிவியல் நிகழ்வுகளில் நடுவராகவும் இருந்திருக்கிறார்.

தகவல் முத்து:

பெண்கள் மற்றும் முதியவர்கள் தங்கள் பாதுகாப்பிற்காகக் காவல் துறையை அழைக்க தங்கள் கைபேசிகளில் `KAVALAN SOS APP' (செயலியை) பயன்படுத்திக் கொள்ளலாம் எனக் காவல்துறை சார்பில் தொடர் விழிப்புஉணர்வு நிகழ்ச்சிகள் நடத்தப்பட்டு வருகின்றன.

சமீபத்தில் தமிழக காவல்துறை சார்பில் வடிவமைக்கப்பட்டு, தமிழக முதல்வர் எடப்பாடி பழனிசாமி காவலன் SOS கைபேசி செயலியை அறிமுகப்படுத்தினார். இந்தச் செயலியை வைத்திருந்தால் பொதுமக்கள், தங்களுக்கு ஒரு பிரச்னை ஏற்படும் போது காவல்துறையைத் தொடர்புகொள்ள 100 என்ற எண்ணை டயல் செய்ய  வேண்டாம். இந்தச் செயலியில் உள்ள SOS பட்டனை அழுத்தினால் போதும். உடனடியாக காவல்துறை கட்டுப்பாட்டு அறைக்குத் தகவல் சென்று சம்பவ இடத்துக்குக் காவல்துறை ரோந்து வாகனம் விரைந்து வரும். சமீபகாலமாக பெண்களுக்கு எதிரான குற்றச் சம்பவங்கள் அதிகரித்து வரும் நிலையில் இதுபோன்ற ஆப்கள் அவர்களுக்கு அவசர காலங்களில் உதவிகரமாக இருக்கும். பெண்கள் அல்லது வயது முதியவர்கள் தங்களுக்கு ஏதாவது பிரச்னை ஏற்படும்போது தங்கள் ஸ்மார்ட்போன்களில் பதிவிறக்கம் செய்து வைத்திருக்கும் காவலன் SOS செயலியில் உள்ள SOS என்ற பட்டனை அழுத்தி காவல்துறை கட்டுப்பாட்டு அறைக்கு தகவல் தெரிவிக்க முடியும். உடனடியாக ஜி.பி.எஸ். மூலம் நாம் இருக்கும் இடத்தை காவல்துறை அறிந்துகொண்டு சம்பவ இடத்திற்கு விரைந்து வந்து உதவும் வகையில் செயலி உருவாக்கப்பட்டுள்ளது. பதிவிறக்கம் செய்த பிறகு, அப்ளிகேஷனை ஓபன் செய்தால், பயனாளர்களின் வசதிக்கேற்ப ஆங்கிலம் / தமிழ் என்று இரு மொழிகள் கொடுக்கப்பட்டுள்ளன. மொழியைத் தேர்வு செய்த பிறகு, ரிஜிஸ்டர் என்ற பட்டனை அழுத்த வேண்டும். ரிஜிஸ்டிரேஷன் (registration) என்ற பக்கத்தில், பயனாளர்கள் தங்கள் அலைபேசி எண், பெயர், மாற்று அலைபேசி எண் ஆகியவற்றைப் பதிவு செய்ய வேண்டும். பின் நெக்ஸ்ட் (NEXT) பட்டனை அழுத்த வேண்டும். அதைத்தொடர்ந்து, பயனாளர் முகவரி, மின்னஞ்சல் முகவரி ஆகியவற்றைப் பதிவு செய்து சைன் அப் (sign up) என்ற பச்சை நிற பட்டனை அழுத்தினால் காவலன் செயலி பயன்படுத்தத் தயாராகி விடும். பயனாளர்கள் ஒருமுறை பதிவு செய்தால் போதுமானது. பிறகு செயலியை எப்போதும் பயன்படுத்திக் கொள்ளலாம். செயலியில், பயனாளர்கள் ஆபத்தில் இருக்கும் போது மூன்று நபர்களுக்குத் தகவல் குறுஞ்செய்தி மூலம் அனுப்பும் வசதியும் இடம்பெற்றுள்ளது. பொதுமக்கள் தங்களுக்குப் பிரச்னை ஏற்படும் போது, அவசரத்தில் காவல்துறையை அழைப்பதற்குச் செயலியை ஓபன் செய்ய வேண்டும். அதில் SOS என்ற பட்டனை ஒரு முறை தொட்டாலே அழைப்பவரின் இருப்பிடம் ஜிபிஎஸ் மூலம் காவல்துறை கட்டுப்பாட்டு அறைக்குச் சென்று விடும்.

அழைப்பவரை உடனடியாக திரும்ப அழைக்கும் வசதி காவல் கட்டுப்பாட்டறையில் உள்ளது. மேலும், அழைப்பவரின் அந்த நேர இருப்பிடத்தை அறிந்துகொள்ளும் ரியல்டைம் டிராக்கிங் வசதியும் உள்ளது. அழைப்பவரின் இருப்பிடத் தகவல் மற்றும் வரைபடம் இந்தச் செயலியில், பதிவு செய்துள்ளவர்களின் எண்களுக்குத் தானாகவே பகிரப்படும். காவலன் Kavalan SOS app பட்டனைத் தொட்டவுடன் உடனடியாக GPS இயங்க ஆரம்பித்து அலைபேசி கேமரா தானாகவே 15 விநாடிகளில் ஒலி-ஒளியுடன் கூடிய வீடியோ எடுத்து காவல் கட்டுப்பாட்டறைக்கு அனுப்பிவிடும். அதிர்வுத் தூண்டல் (shake trigger) வசதியின் மூலமும் தொடர்பு கொள்ளலாம். இணைய இணைப்பு இல்லாத (Data not available) இடங்களிலும் கூட தானியங்கி எச்சரிக்கை (Auto SMS Alert) மூலமாகச் செயல்படும். 

Kavalan SOS app செயலி மிகவும் அவசர நிலையில் இருக்கும் பெண்கள், முதியோர்கள் மற்றும் குடிமக்களின், பாதுகாப்புச் செயலியாக 24 மணி நேரமும் இயங்குவதால் இந்த வசதியை தங்கள் கைபேசிகளில் பதிவு செய்து பயன்படுத்திக்கொள்ளுமாறு சென்னை மாநகரக் காவல் துறை பொதுமக்களுக்கு அறிவுறுத்திவருகிறது.

காவலன் SOS செயலியைப் பெற: 

ஆண்ட்ராய்டு: https://play.google.com/store/apps/details?id=com.amtexsystems.kavalansos

ஐ-போன்களில் காவலன் செயலியைப் பெற: https://itunes.apple.com/in/app/kavalan-sos/id1388361252?mt=8

மேலே குறிப்பிட்டுள்ள லிங்க்-ஐ பயன்படுத்தி, ஸ்மார்ட் போன்களில் காவலன் SOS செயலியைப் பதிவிறக்கம் செய்து கொள்ளலாம்.

கசப்பு முத்து:

எங்கள் பொறியாளர் நேற்று தாமதமாக வந்தார். ஒரு துக்கத்துக்கு போய் வந்ததாகச் சொன்னார். இறந்தது அவர் நண்பராம். நல்ல வேலையிலிருந்தவர். மனைவி, ஒரு மகன் இருக்கிறார்கள். சின்ன வயதிலிருந்தே மதுவிற்கு அடிமையானவர். உற்றவர்களின் புத்திமதி, தனக்கிருக்கும் பொறுப்புகள், உடல் பாதிப்புகள் எதுவுமே அவரை பயமுறுத்தவோ, திருத்தவோ முடியவில்லையாம். குடல்கள் நிறைய இடங்களில் வெட்டப்பட்டும் அவர் தன்னை மாற்றிக்கொள்ளவில்லையாம். லாக் டவுன் நேரத்தில் மது கிடைக்காமல் தவித்து விட்டாராம். டாஸ்மாக் மீண்டும் திறந்தவுடன் முதல் ஆளாய் சென்று வாங்கிக் குடித்திருக்கிறார். ரத்தம் வாயிலிருந்து வழிய ஆரம்பித்ததும் ‘ எப்படியும் சாகத்தான் போகிறேன். இன்னும் கொஞ்சம் குடித்து விட்டு சாகிறேன்’ என்று அனைவரையும் எதிர்த்துப்பேசி, கெஞ்சி, மேலும் குடித்து இரத்தம் வழிய வழிய இறந்து போனாராம். எப்படிப்பட்ட குடிகாரனாக இருந்தாலும் மரணம் அருகில் வந்து விட்டது தெரிந்தால் ஒரு பயம் வந்து விடும். அதைக்கண்டு கூட பயப்படாத மது வெறியர்கள் பற்றி என்ன சொல்வதென்று புரியவில்லை!

இசை முத்து

இந்தப் பாட்டு கொஞ்ச நாட்களாக மனதிலேயே ஒலித்துக்கொண்டிருக்கிறது. எங்கே சென்றாலும் தொடர்ந்து வந்து கொண்டேயிருக்கிறது. சிலர் இந்தப்பாட்டை முன்னாலேயே கேட்டிருக்கலாம். திரைப்படப்பாடல்தான் என்றாலும் முதிர்ச்சியான ஒரு இளைஞர் பாடும்போது அது வேறு விதம். அதையே ஒரு சிறிய குழந்தை பாடும்போது மெய் சிலிர்க்கிறது. கண்ணீர் கசிகிறது!! அந்தப்பாடல் வரிகள் அற்புதம். இந்த மாதிரி வரிகளை ஒரு அருமையான இசையில் இனிமையான குரலில் கேட்கும்போது, மனம் மயங்கி விடுகிறது. அதை விட்டு வெளியில் வந்தாலும் மனது அதை விட்டு வெளியில் வர மறுக்கிறது.

நீங்களும் கேட்டுப்பாருங்கள்.

முத்துக்குவியல்-55!!!!

அறிவிப்பு முத்து:

சென்ற பதிவுடன் நான் 400 பதிவுகளை முடித்து விட்டதை இப்போது தான் கவனித்தேன். கொஞ்சம் ஆச்சரியமாகவே இருந்தது. முக்கிய காரணங்களால் தமிழ்நாட்டுக்கும் அரபு நாட்டிற்கும் தொடர்ந்த பிரயாணங்கள் ஏற்பட்டதால் பிரயாணங்களையொட்டி மிகுந்த அலைச்சல்கள், உடல்நலக்குறைவுகள் எனத்தொடர்ந்து கொண்டேயிருந்ததில் மனம் விரும்பிய அளவு வலைத்தளத்தில் அதிக நேரம் என்னால் ஒதுக்க முடியவில்லை. அப்படியும் நானூறா என்று ஆச்சரியமாக இருக்கிறது. இனி அதிக நேரம் வலைத்தளத்தில் செலவு செய்ய வேண்டுமென்று நினைத்திருக்கிறேன். பார்க்கலாம். எனக்கு பக்க பலமாக நல்லதொரு பின்னூட்டங்கள் தொடர்ந்து கொடுத்து என் உற்சாகத்திற்கு காரணமாக இருக்கும் வலையுலக அன்புள்ளங்களுக்கு மனமார்ந்த நன்றி!

இசை முத்து:

 இப்போதெல்லாம் மிகத்திறமையான இளைஞர்கள் வயலின் வழியாக, புல்லாங்குழல் வழியாக, குரல்வழியாக சில சமயங்களில் ஃப்யூஷன் இசை வழியாக அருமையான ராகங்களையும் அதற்கான அற்புதமான பாடல்களையும் பதிவேற்றி அசத்தி வருகிறார்கள். இந்த ஃப்யூஷன் பாடல் அப்படித்தான் நம்மை அசத்துகிறது. இந்த பாடல் சந்திரகெளன்ஸ் ராகத்தில் வருகிறது. தர்பாரி கானடா போல வட இந்திய ராகம் இது. இதை இரவு ராகம் என்பார்கள். மனதை மயங்கச் செய்யும், சில சமயம் ஒரு விதமான வேதனை இருக்கும். கடவுளுக்கு ஆராதிக்கும் ராகம் என்றும் சொல்லப்படுகிறது.கேட்டு ரசியுங்கள்!!!



அசத்தும் முத்து:

கேரளாவில்  ஆலப்புழை  மாவட்டத்தில்  உள்ள செட்டிகுலங்கார தேவி  கோயிலில் 11 அடி  உயரத்தில்  ஒரு விளக்கு  இருக்கிறது.  இந்த விளக்கு  1000  திரிகள் ஏற்றக்கூடிய  வகையில்  13 அடுக்கு வரிசைகளுடன்   அமைந்துள்ளது.  1500 கிலோ எடையுள்ள  கன்மெட்டல்  என்ற  உலோகத்தால் ஆன இந்த விளக்குதான் இந்தியக் கோயில்  விளக்குகளில்  மிகப்பெரியது.

இரண்டு பொற்கொல்லர்கள் 17 துணை ஆட்கள் உதவியுடன் 18 மாதங்களில் இந்த விளக்கை செய்து முடித்துள்ளார்கள். இதன் அகலம் 6.8 அடி. இதன் மிகச்சிறிய அடுக்கில் 108 திரிகள் ஏற்ற முடியும்.

எச்சரிக்கை முத்து:

தரமற்ற தண்ணீர் விற்பனை செய்தால்:

தண்ணீர் கான்களில் விற்பனை செய்யும் நிறுவனத்தின் பெயர், முகவரி, தயாரிக்கப்பட்ட தேதி, ஐ.எஸ்.ஐ முத்திரை, உணவு பாதுகாப்பு தர நிர்ணய ஆணையத்தின் உரிமம் உள்ளிட்டவை கண்டிப்பாக அச்சடிக்கப்பட வேன்டும். அவ்வாறின்றியும் தரமின்றியும் தண்ணீர் வினியோகிக்கபடுவது தெரிய வந்தால் 94440 42322 என்ற வாட்ஸ் அப் எண்ணுக்கு புகார் அனுப்பலாம். விசாரணையில் விதிமீறலில் ஈடுபடும் நிறுவனங்களுக்கு சீல் வைப்பது மற்றும் சட்ட ரீதியிலான நடவடிக்கைகள் பாயும்.

ரசித்த முத்து:

இயக்கம் சிறப்புற தானம்,
பேராசை இல்லா சேமிப்பு,
ஆணவம் இல்லா அறிவு,
ஏமாளி ஆகாத இரக்கக்குணம்,
பூமியை வணங்கும் பக்தி,
மரங்களை நண்பனாக்கும் யுக்தி,
வாழ்வின் வளத்திற்கான அற்புத சக்தி!!!

முத்துக்குவியல்-54!!!!

தகவல் முத்து:

கண் நீர் அழுத்த நோய்

கிளாக்கோமா என்னும் கண் நீர் அழுத்த நோய் பார்வை நரம்பை பாதிக்கக்கூடியது. பார்வை நரம்பு என்பது கண்களிலிருந்து மூளைக்கு தகவல்களை எடுத்துச் செல்வது. கண்ணில் ஏற்படும் அதிக நீர் அழுத்தம் பார்வை நரம்பை அழுத்தி, பாதித்து முதலில் பக்க பார்வையை குறைத்து விடும். அதன் பிறகும் ஏற்படும் அதிக அழுத்தம் படிப்படியாக பார்வையை குறைத்து விடும்.

பிறந்த குழந்தையிலிருந்து அனைத்து வயதினரையும் தாக்கும் நோய் இது. ஆனால் பலருக்கு இந்த நோயின் அறிகுறிகள் எதுவும் தெரியாது.அதனால் 40 வயதுக்கு மேலுள்ள அனைவருமே கண் பரிசோதனைகள் செய்து கொள்ள வேண்டும்.

கண் நீர் அழுத்த நோயால் பார்வை பாதிக்கப்பட்டால் இழந்த பார்வையை மீட்க இயலாது. எனினும் ஆரம்ப நிலையிலேயே கண்டு பிடிக்கப்பட்டு சிகிச்சை எடுத்துக்கொண்டால் எதிர்காலத்தில் பார்வை இழப்பு ஏற்படுவதை தவிர்க்கலாம். இதற்கு தொடர்ந்த மருத்துவரின் கண்காணிப்பும் சிகிச்சையும் மிக மிக அவசியம்.

இது பரம்பரையாக தாக்கக்கூடியது. நெருங்கிய உறவில் கிளாக்கோமா பாதிப்பு உள்ளவர்கள் இருந்தால் மற்றவர்களும் வருடத்திற்கொரு முறை கிளாக்கோமா பரிசோதனை நல்லதொரு கண் மருத்துவ மனையில் செய்து கொள்ள வேண்டியது மிக அவசியம்.

உயர் இரத்த அழுத்தம் இருந்தால் உயர் கண் அழுத்தம் இருக்க வேண்டிய அவசியமில்லை என்றாலும் உயர் இரத்த அழுத்தத்தால் உயர் கண் அழுத்தம் தோன்றுவதற்கு வாய்ப்புகள் உள்ளன.

ஆச்சரிய முத்து:

என் மூத்த சகோதரிக்கு 75 வயதாகிறது. மூன்று வருடங்களுக்கு முன் அவருக்கு வயிற்று வலி  தொடர்ந்து வந்ததன் காரணமாக பல வித பரிசோதனைகள் செய்ததில் அவருக்கு அம்ப்ளிக்கல் ஹெர்னியா இருப்பது கண்டு பிடிக்கப்பட்டது. அதைத்தொடர்ந்து அவருக்கு அறுவை சிகிச்சை செய்யலாமென்று ஆலோசனை செய்ததில் இதய பரிசோதனைகளில் அவரின் இதயத்தின் வால்வு பகுதியில் பிரச்சினை இருப்பது தெரிய வந்தது. அதனால் அறுவை சிகிச்சை செய்தால் உயிருக்கு ஆபத்து வ‌ரலாமென்று மருத்துவர்கள் சொன்னதில் அவரும் காரமேயில்லாத செரிமானம் ஆகக்கூடிய உணவுகளையே சாப்பிட்டு வந்தார். ஆனால் உடலினுள்ளே குடல் இருப்பதே தெரியாமல் சுற்றிக்கொண்டு, வலி, வாந்தி என்று சென்ற வாரம் திடீரென்று மிகவும் அவதிப்பட, அவரை மருத்துவமனையில் சேர்த்தார்கள். குடல் வெடித்தும் விடும் அபாயம் இருப்பதால் உடனே அறுவை சிகிச்சை செய்து குடலை ஏற்றி வைத்து தைக்க முடிவு செய்தார்கள். அறுவை சிகிச்சை நடைபெறும் மேடையிலேயே எது வேண்டுமானாலும் நடக்குமென்று சொல்லியே செய்தார்கள். இதய மருத்துவர், மயக்க மருந்து கொடுக்கும் மருத்துவர்கள் மூவர் அருகிலிருக்க அறுவை சிகிச்சை நடந்தது. இங்கே துபாயில் நாங்களெல்லாம் கதி கலங்கிக்கொண்டிருந்தோம். ஆனால் அறுவை சிகிச்சை எந்த வித பிரச்சினையுமின்றி நடந்தேறியது!!! என் சகோதரி உயிர் பிழைத்தார் என்பதையே நம்ப முடியவில்லை! மூன்று வருடங்களாக பயந்து கொண்டிருந்த விஷயம் இது!

புன்னகை முத்து:

என் பேரன் வாங்கிய மெடல்களை தன் கழுத்தில் மாட்டிக்கொண்டு என் பேத்தி கொடுத்த போஸ்!

மருத்துவ முத்து:

பூனையால் கண்களில் ஏற்படும் பாதிப்பு:

பூனையின் கழிவில் உள்ள நுண் தொற்றுக் கிருமி TOXOPLASMOSIS GONDII  கண்களை பாதிக்கும். இதன் காரணமாக பார்வைக்குறைவு ஏற்படுவதற்கான சாத்தியக்கூறுகள் அதிகம் உள்ளன. இந்தக்கிருமி மனிதனின் இரத்தத்தில் கலந்து பின் கண்களை பாதிக்கிறது. எந்த இடத்தில் அழற்சி ஏற்படுகிறதோ அந்த இடத்தைப்பொறுத்து பார்வை இழப்பை குணப்படுத்த முடியும். பாதிப்பு பார்வை நரம்புகளில் இருந்தால் பார்வை இழப்பை சரி செய்ய முடியாது. பார்வை நரம்பை சுற்றியுள்ள இடங்களில் பார்வை இழப்பை குறைக்கலாம்.

இசைக்கும் முத்து:

துன்பங்களிலும் பிரச்சினைகளிலுமிருந்து சிறிது நேரம் நம்மை மறந்து இளைப்பாற நல்ல புத்தகங்களும் இசையும் வேண்டும் என்று சொல்பவர்களில் நானும் ஒருத்தி. ஆனால் வாசிப்பதைக்காட்டிலும் சற்று உயர்ந்த நிலையிலுள்ளது இசை. வாசிக்கும்போது கூட சில சம‌யங்களில் அதிலிருந்து கவனம் சிதறும். ஆனால் நல்ல இசை பிரச்சினைகளில் உழன்று கொண்டிருக்கும்போது கூட நம்மை அதிலிருந்து தன்பால் வசப்படுத்தக்கூடிய சக்தி கொண்டது.

சத்யநாராயணன் ஒரு பிறவி இசைக்கலைஞர். மேற்கத்திய வாத்தியத்தில் ஆறு வயது பாலகனாக இருந்தபோதே மாபெரும் கச்சேரி செய்தவர். 

லண்டன் ட்ரினிட்டி கல்லூரியில் எலெக்ட்ரானிக் கீபோர்டில் எட்டாவது கிரேடை தேர்ச்சி செய்த இளைஞர்களில் ஒருவர். 1900ற்கும் மேற்பட்ட கச்சேரிகளை உலகமுழுதும் நடத்தியுள்ளார். கலைமாமணி உள்பட பல பட்டங்களைப்பெற்றுள்ள‌ இவர் புகழ்பெற்ற இசைக்கலைஞர்கள் டாக்டர் பாலமுரளி கிருஷ்ணா, கன்யாகுமரி முதலியவர்களிடம் பாடம் பெற்று இணைந்து வாசித்துள்ளார். பல வாத்தியங்கள் இவரின் கை விரல்களில் உயிர் பெற்று நர்த்தனமாடுகின்றன.

இங்கே ஹம்ஸத்வனி ராகத்தை கலைஞர் சத்யநாராயணன் தன் எலெக்ட்ரானிக் கீபோர்டில் ட்ரம், கிடார், மிருதங்கம், வயலின், கடம் புடை சூழ வாசிப்பதை ரசித்து அனுபவிக்கலாம்!