ஊறுகாய் மகாத்மியம்!

வெய்யில் காலம் வந்தாலே ஊறுகாய்கள், வடகங்கள், வற்றல் வகைகள் என்று வருஷம் முழுவதும் வைத்துக்கொள்ள வீட்டுக்கு வீடு பெண்கள் எல்லோரும் அவற்றைத்தயார் செய்வதில் எப்போதும் ஈடுபடுவார்கள்.
 [ இப்போது அப்படிப்பட்ட நிலைமை வீட்களில் இருக்கின்றனவா?] 

சின்ன வயதில் அரிசி மாவில் செய்யப்படும் கூழ்வடகங்களை பெரியவர்கள் செய்ய ஆரம்பிக்கும்போது, அதற்கான கூழ் கிண்டி வைக்கும்போதே ஒரு கிண்ண‌த்தில் அதை எடுத்துப்போட்டுக்கொண்டு ருசிக்க ஆரம்பிப்போம். அது அத்தனை ருசியாக இருக்கும். அப்புறம் அதில் கூழ்வடகங்கள் பிழிந்து காயவைக்கும்போது காய்ந்தும் காயாமல் இருக்கும் அவற்றில்ல் சில எடுத்து வாயில் போட்டு சுவைப்பது தனி சுகம்.

பிப்ரவரி, மார்ச்ச் மாதங்களிலேயே குடமிளகாய்களை சிறியதாய் பார்த்துப் பார்த்து வாங்கி அவற்றை தயிரில் போட்டு குடமிளகாய் வற்றல் தயாரிக்கும் வேலைகள் ஆரம்பிக்கும். வீடு முழுவதும் தயிரில் தோய்ந்திருக்கும் குடமிளகாய் வாசனை ஆளைத்தூக்கும். அப்புறம் மார்ச், ஏப்ரல் மாதங்களில் மாவடுகள் சீசன் ஆரம்பிக்கும். குண்டு மாவடுகளில் சுவை அதிகமா, நீள‌ மாவடுகளில் சுவை அதிகமா என்று விவாதங்கள் நடக்கும். தஞ்சையில் பூச்சந்தை என்று ஒரு இடம் இருக்கிறது. எப்போதும் விடியற்காலையில் அங்கு போய் இளசாக குட்டி குட்டி மாவடுகள் வாங்கி வந்து உடனேயே நீர் மாவடு போட்டு விடுவது வழக்கம். மாவடு வர ஆரம்பிக்கும்போது, கிலோ 100 ரூபாய்க்குக் கூட விற்கும். அதற்கெல்லாம் மனம் அஞ்சுவதில்லை. மாவடு ஊறுகாய் போட்டால் தான் மனம் திருப்தி அடையும். பெரிய கல்சட்டியில் போட்டு முழுவதும் தயாரான பிறகு, அதை ஜாடிகளில் மாற்றி, பின் இங்கு வருகையில் அதை ஃபிரிட்ஜில் வைத்து வருவது என்று இன்றைக்கும் இந்தப்பழக்கம் தொடர்கின்றது.

இந்த தடவை மார்ச்சிலேயே இங்கு வந்து விட்டதால் மாவடுகளை மிஸ் பண்ணி விட்டேன்!!
இப்போது மாங்காய் சீசன் ஆரம்பித்து விட்டது. இங்கிருந்து கொண்டே மாங்காய்களுக்கான பெருமூச்சு தொடர்கின்றது. இங்கு, [துபாய், ஷார்ஜா ] கேரளத்து மாங்காய்கள் மே மாத வாக்கில் வர ஆரம்பிக்கும். அது மிகவும் சுவையாக இருக்கும். [என்ன இருந்தாலும் நம் கிளிமூக்கு மங்காய்களுக்கு கிட்டே வர முடியாது!] அவற்றை வாங்கி வெந்தய மாங்காய் ஊறுகாய் போடுவது வழக்கம். இப்போதும் போட்டு விட்டேன்.  
  
ஜுன் மாதம் ஊருக்குச் செல்லவிருப்பதால் மனம் இப்போதே மாங்காய்களுக்காக காத்திருக்க ஆரம்பித்து விட்டது. கிளி மூக்கு மாங்காய்களை நல்லதாய் கெட்டியாய் தேர்ந்தெடுத்து மாங்காய்த்தொக்கு, வெந்தய மாங்காய்,  ஆவக்காய் ஊறுகாய்கள் தவிர மாங்காய்களை அரிந்து இந்த சுக்கு வெய்யிலில் வற்றல் போடும் வேலையும் ஆரம்பித்து விடும். மாங்காய்களை குறுக்காக விரல் நீளத்திற்கு அரிந்து துண்டுகள் போட்டு உப்பு நீரில் கலந்து நன்றாக காய வைத்தால் மாங்காய் வற்றல் தயாராகி விடும். மயிலாடுதுறைப்பக்கம் தண்னீரில் மாங்காய்த்துண்டுகள் போட்டு, உப்பும் போட்டு, ஒரு கொதி வந்ததும் தண்ணீரை முழுவதுமாக வடித்து, மாங்காய்த்துண்டுகளை சுக்கலாகக் காய வைத்து எடுப்பார்கள். அவையும் மிகவும் சுவையாக இருக்கும். இந்த வற்றல்கள் வருடக்கணக்கில் கெடாது இருக்கும். வேண்டும்போது சில வற்றல்களை எடுத்து வென்னீரில் போட்டு வைத்தால் அவை சில மணி நேரங்களில் மிருதுவாகி விடும். பின் அவற்றை வற்றல் குழம்பில் போட்டு  உபயோகிப்பது வழக்கம். சீசன் இல்லாத நேரங்களில் என் மாமியார் அப்படி ஊறவைத்த மாங்காய்த் துண்டுகளில் ஊறுகாய் போட்டு ஜாடியில் நிறைத்து வைப்பார்கள். அத்தனை சுவையாக இருக்கும். சீக்கிரமே ஜாடி காலியாகியும் விடும்!!

ஒரு முறை ஐந்து நட்சத்திர ஹோட்டல் ஒன்றில் உணவருந்தச் சென்றிருந்தோம். அப்போது பரிமாறிய மாங்காய் ஊறுகாய் அப்படியே அசத்தி விட்டது. மாங்காய்த்துண்டுகளில் கலோஞ்சி விதைகள் தூவி, சீனிப்பாகு ஊற்றியிருந்தார்கள். அதன் சுவை மயக்க, உடனேயே சமையல் நிபுணரை அழைத்து, பாராட்டி, அதன் செய்முறையையும் வாங்கி செய்து பார்த்து விட்டேன். சுவை அத்தனை அற்புதம்!

இதற்கெல்லாம் அப்புறம் தான் கடாரங்காய், நார்த்தை, எலுமிச்சை, நெல்லி ஊறுகாய்கள். கடாரங்காய், நார்த்தையில் வெல்லம் சேர்த்து செய்யும் ஊறுகாய்கள் மிக மிக ருசியாக இருக்கும்.  கடாரங்காய் ஊறுகாய் எப்போதும் வீட்டில் இருக்கும். எலுமிச்சை மட்டும் தான் கடைசி லிஸ்ட்டில் இருக்கும்.

இங்கு பெரும்பாலும் வருடம் முழுவதும் நெல்லிக்காய்க்ள் கிடைக்கும். சில சமயங்களில் மாங்காய் இஞ்சியும் நிறைய கிடைக்கும். இப்போது வரப்போவது மாங்காய் இஞ்சி தக்காளி ஊறுகாய்!!

மாங்காய் இஞ்சியைப்பற்றி சில வார்த்தைகள்!

மாங்காய் வாசத்துடன் இஞ்சி சுவையுடன் இஞ்சி போன்ற தோற்றத்திலிருப்பதால் மாங்காய் இஞ்சி என்று பெயர்  அமைந்திருக்கிறது. இதில் உடலுக்குத்தேவையான அத்தனை தாதுப்பொருள்களும் விட்டமின்களும் இருக்கின்ற‌ன. அதனால் அடிக்கடி மாங்காய் இஞ்சியைச் சேர்ப்பது உடம்புக்கு நல்லது. முக்கிய‌மாக  வயிற்றுக்கோளாறுகளுக்கு மிகவும் நல்லது. இது வாயுவை நீக்கி, கெட்ட பாக்டீரியாக்களை அழித்து, குடலில் நிறைந்திருக்கும் நச்சுப்பொருள்களை அழிக்கும் சக்தி வாய்ந்தது. இதன் துருவல்களைக்கொண்டு சாதத்தில் சேர்த்து சாப்பிடுவதும் சிறு துண்டுகள் செய்து எலுமிச்சை ரசம் கலந்து உப்பு சேர்த்து சாப்பிடுவதும் மிகவும் நல்லது.

மாங்காய் இஞ்சி ஊறுகாய்

தேவையானவை:

மாங்காய் இஞ்சி தோல் சீவிய துன்டுகள்- ஒரு கப்
தக்காளியை ஒன்று பாதியாய் அரைத்தது- ஒன்றரை கப்
பொடியாக நறுக்கிய சிறு பூண்டுகள்- ஒரு கைப்பிடி
நல்லனெண்ணெய் -அரை கப்
பொன்னிறமாக வறுத்த வெந்தயம்- ஒரு ஸ்பூன்
பொரித்த பெருங்காய்த்துண்டுகள்- அரை நெல்லி அளவு
மிள‌காய்த்தூள் -ஒரு மேசைக்கரண்டி
மஞ்சள் தூள் -அரை ஸ்பூன்
தேவையான உப்பு
எலுமிச்சம்பழம் -ஒன்று
கடுகு -ஒரு ஸ்பூன்

செய்முறை:

வறுத்த சாமான்களைப் பொடித்துக்கொள்ள‌வும்.
மாங்காய் இஞ்சித்துண்டுகளை துருவிக்கொள்ள‌வும்.
நல்லெண்ணையை ஒரு வாணலியில் கொட்டி குறைந்த தீயில் சூடாக்கவும்.
கடுகைப்போட்டுப் பொரிந்ததும் மாங்காய்த்துருவலை பூண்டு, மஞ்சள் தூளுடன் சேர்த்து சில நிமிடங்கள் வதக்கவும்.
பிறகு தக்காளி சேர்த்து தீயை சற்று அதிகமாக்கி சமைக்கவும்.
தக்காளி நன்கு வெந்து தண்ணீர் வற்றி எண்ணெய் மேலே மிதக்க ஆரம்பித்ததும் மிள‌காய்த்தூள், உப்பு, எலுமிச்சை சாறு சேர்த்துக்கிளறவும்.
சில நிமிடங்கள் கழித்து பொடித்த தூள்கள் சேர்த்துக் கலக்கவும்.
சுவையான மாங்காய் இஞ்சி ஊறுகாய் தயார்!

குறிப்பு:

தக்காளியின் தன்மையைப்பொறுத்து சில சமயம் மிளகாய்த்தூள் சற்று அதிகமாகத் தேவைப்படலாம். சுவைத்துப்பார்த்து, சற்று கூடுதலாக மிளகாய்த்தூள் சேர்த்துக்கொள்ள‌லாம்.
படங்கள்: கூகிள்