பொங்கலோ பொங்கல்!!

பொங்கல் பற்றிய சில வித்தியாசமான செய்திகள்:

பொங்கல்:

கர்நாடகாவிலுள்ள சிக்மகளூர் அருகே அமைந்துள்லது தர்மசாஸ்தா திருத்தலம். அதன் அருகே அமைந்துள்ளது அண்ணப்ப சுவாமி கோவில். வருடம் ஒரு முறை பொங்கலன்று மட்டுமே இந்தக் கோவில் திறக்கப்படுகிறது. அன்று மட்டுமே வழிபாடுகள் நடத்தப்படுகின்றன. இங்குள்ள 140 படிகளில் ஏறிச்சென்று வழிபாடு நடத்த ஆண்களுக்கு மட்டுமே அனுமதி. பெண்களுக்கும் குழந்தைகளுக்கும் அனுமதியில்லை.

பெங்களூரிலுள்ள ராமகிருஷ்ண மடம் அருகே உள்ளது கவி கங்காதேஸ்வரர் கோவில். இங்கு ஒவ்வொரு ஆண்டும் பொங்கலன்று சூர்யப்பாதையில் மாற்றம் ஏற்படும் நேரமான மாலை 5.45 முதல் 6 மணி வரை ஒரு விந்தையான நிகழ்வு ஏற்படுகிறது. அந்த நேரம் குகைக்கோவிலுள்ளே மூலவரின் மீது சூரிய ஒளி விழுகிறது. அடுத்து சிவ லிங்கத்தின் மீது முழுவதுமாகப் பரவி  பின் மறைகிறது. பொங்கல் நாளில் சூரிய பூஜை காணும் இந்த விக்ரகத்தை வணங்கினால் கண் தொடர்பான நோய்கள் நீங்கும் என்பது மக்கள் நம்பிக்கை!

மாட்டுப்பொங்கல்:

அன்று அதிகாலை திருவண்ணாமலையில்  அண்ணாமலையாரும் உண்ணாமுலை அம்மனும் மூன்று முறை வீதி உலா வருவார்கள். அன்று மாலை ராஜ வீதியிலுள்ள‌ திருவூடல் வீதிக்கு எதிர் எதிராக இருவரும் நிற்பார்கள். பின் அண்ணாமலையார் அம்மனை நோக்கி வர, அம்மன் சுவாமியைக் கடந்து செல்வார். கோயில் கருவறை சென்று அடைந்து கொள்ள, இறைவன் வந்து சமாதானம் செய்வார். இதற்கு 'திருவூடல்' என்று பெயர். இந்த நிகழ்ச்சியில் கலந்து கொண்டால் அவர்கள் வாக்கை சிறந்து விளங்கும் என்பது ஐதீகம்!!

பொங்கல் நினைவுகள்:

பல வருடங்களுக்குப்பின்பு பொங்கலுக்கு தமிழ்நாட்டில் இருக்கிறேன். இளம் வயதில் பெற்றோருடன் பொங்கல்! அப்போதெல்லாம் பொங்கல் வாழ்த்துக்களை தபால்காரரிடமிருந்து வாங்குவதற்கு எனக்கும் என் இளைய சகோதரிக்கும் தனிப்போட்டியே நடக்கும்.

புகுந்த வீடு கிராமத்தில் என்பதால் மாமியாரும் கொழுந்தனார்களும் சேர்ந்து பொங்கல் கொண்டாடியதும் மாட்டுப்பொங்கலை பெரிய விசேஷமாகக் கொண்டாடியதும் கன்னிப்பொங்கலன்று வீட்டுப் பெண்கள், நண்டு சிண்டுகளுடன் மாலையில் கட்டு சாதங்களுடன் ஆற்ற‌ங்கரைக்குச் சென்று  ரசித்து சிரித்து, சாப்பிட்டு வந்ததும் இன்னும் பசுமையாக, இனிமையாக மனதில் நிறைந்திருக்கிறது!

அப்புறம் வெளிநாட்டில், பாலைவன நாட்டில் பொங்கல்! மனைவி, மக்களைப்பிரிந்து தனிமையில் வாடிக்கொண்டிருக்கும் நண்பர்களையெல்லாம் அழைத்து பொங்கல் விருந்து அளிப்பது வாடிக்கையானது. எல்லோருமே பொங்கலன்று அலுவலகம் செல்வார்கள் என்பதால் விடியற்காலை நான்கு மணிக்குக் குளித்து பொங்கல் செய்ய ஆரம்பித்தால் காலை ஏழு மணிக்குள் சர்க்கரை பொங்கல், வெண் பொங்கல், பொங்கல் குழம்பு, ஆவி பறக்க இட்லி, சட்னி என்று தயாராகி விடும். ஏழு மணியிலிருந்து நண்பர்கள் சாப்பிட வருவார்கள். இப்படி பல வருடங்கள்! நண்பர்கள் எல்லாம் மறுபடி தமிழ்நாட்டிற்கு திரும்பிய பிறகு, இளைய தலைமுறைகள் அதிகம் பழக்கமில்லாமல் இந்தப் பழக்கமும் மெல்ல மெல்லக் குறைந்தது.

தற்போதைக்கு புதிய இல்லப் பணிகளுக்காக தஞ்சையில் ஒரு சில மாதங்கள் தங்க இருப்பதால் பல வருடங்களுக்குப்பிறகு தஞ்சையில் குடும்ப நண்பர்களுடன் பொங்கலைக் கொண்டாடுகிறோம்!

நீங்களும் தைப்பொங்கலை மனதிற்கு இனியவர்களுடன் மகிழ்வுடன் கொண்டாடுங்கள்!! இனிய பொங்கல் வாழ்த்துக்கள்!

பொங்கல் வாழ்த்து நன்றி கூகிளுக்கு!